Mango Market : अक्षय तृतीयेच्या मुहूर्तावर वाशीत ९० हजार आंबा पेट्या

Ratnagiri News : अक्षय तृतीयेच्या मुहूर्तावर नवी मुंबईतील बाजार समितीत कोकणातील हापूसच्या सुमारे ९० हजार पेट्या दाखल झाल्या आहेत. गुढीपाडवा, अक्षय्य तृतीया हे विशेष मुहूर्त असल्यामुळे हापूस आंबा विक्रीसाठी वाशीला आला आहे. निर्यातीच्या गोंधळामुळे यंदा हापूसचे दर गतवर्षीपेक्षा कमी आहेत. सध्या पाच डझनच्या पेटीचा सर्वाधिक दर २३०० रुपये असल्याचे व्यापाऱ्यांनी सांगितले.

गुढीपाडव्यापासून आंबा मोठ्या प्रमाणात बाजारात विक्रीसाठी आला. यंदा चार ते पाच टप्प्यात आंब्याला मोहर आला. उत्पादनही मुबलक आले आहे. नवी मुंबईच्या मार्केटमध्ये १ लाख पेटी आंबा दाखल झाला. त्यात ४७ हजार पेटी कोकणातील हापूसच्या तर ५३ हजार पेटी ही अन्य राज्यातील आंब्याच्या होत्या.

गुरुवारी (ता. ९) सकाळी अपेक्षेपेक्षा कमी पेट्या वाशीत दाखल झाल्या. गुरुवारी ८२ हजार ६०८ पेट्यांपैकी कोकणातील ४३ हजार ३३६ तर अन्य राज्यातील ३९ हजार २७२ पेटी आंबा होता. देशभरातील सर्व प्रसिद्घ मार्केटमध्ये रत्नागिरी हापूसने छाप टाकली आहे.

आखाती देशातील हापूसच्या निर्यातीत अडचणी आल्यामुळे यंदा जम्मू काश्मीर राज्यातही हापूस विक्रीला पाठवला गेला. दुबई बाजारात रत्नागिरी हापूसची पेटी ५ हजार रुपये दराने विकली जात आहे.

मेच्या पहिल्या पंधरवड्यात आंबा कमी असल्याचे बागायतदारांनी सांगितले. त्यामुळे वाशीत अक्षय तृतीयेला गेलेल्या पेट्यांच्या संख्येवर परिणाम झाला. त्याचा फायदा हापूसचे दर स्थिरावण्यासाठी होऊ शकतो.