Mulberry Cultivation : तुती लागवडीसाठी ८०१ एकरांवर नोंदणी

Parbhani News : परभणी व हिंगोली जिल्ह्यातील शेतकऱ्यांनी ‘महारेशीम अभियान २०२४’ अंतर्गत रेशीम विभागाकडे ८०१ एकरवर तुती लागवडीसाठी नोंदणी केली आहे. त्यात परभणी जिल्ह्यातील ४४३ एकर व हिंगोली जिल्ह्यातील ३५८ एकर नोंदणीचा समावेश आहे. केवळ या दोन जिल्ह्यात रेशीम विभागाने तुती लागवड नोंदणीचे उद्दिष्ट पूर्ण केले आहे.

कृषी विभाग व ग्रामपंचायत विभागाकडे तुती लागवडीसाठी नोंदणी झाली नसल्यामुळे त्यांचे उद्दिष्ट कागदावरच आहे. दरम्यान, या जिल्ह्यात तुती रोपवाटिका तयार करण्याची कामे सुरू झाली आहेत. त्यामुळे येत्या जूनमध्ये नवीन तुती लागवड करण्यासाठी रोपे उपलब्ध होतील, असे रेशीम विभागाच्या सूत्रांनी सांगितले.

बदलत्या हवामान स्थितीत पारंपरिक शेती पिकाच्या उत्पन्नाची जोखीम कमी करून शाश्वत उत्पन्नासाठी शेतकऱ्यांनी रेशीम शेतीकडे वळावे. रेशीम उद्योगाबाबत व्यापक प्रमाणात जनजागृती व तुती लागवड करण्यासाठी शेतकऱ्यांची नोंदणी करणे या दुहेरी उद्देशाने हे महारेशीम अभियान राबविले जाते. नोव्हेंबर ते जानेवारी दरम्यान राबविण्यात आलेल्या ‘महारेशीम अभियाना’मध्ये परभणी जिल्ह्यात १ हजार १०० एकर व हिंगोली जिल्ह्यात ७५० एकर असे एकूण १ हजार ८५० एकर तुती लागवडीसाठी नोंदणीचे उद्दिष्ट होते.

परभणी जिल्ह्यात रेशीम विभागाला ३५० एकर, कृषी विभागाला ४०० एकर, जिल्हा परिषद अंतर्गत ग्रामपंचायत विभागाला ३५० एकर असे एकूण १ हजार १०० एकरांवर तुती लागवड नोंदणीचे उद्दिष्ट होते. परंतु केवळ रेशीम विभागाकडे ४४३ एकरांवर तुती लागवडीसाठी शेतकऱ्यांनी नोंदणी केली. कृषी व ग्रामपंचायत विभागाकडे नोंदणी झालेली नाही. परभणी जिल्ह्यात जुनी व नवीन मिळून ५७९ शेतकऱ्यांकडे ६१८ एकरांवर तुती लागवड आहे, असे जिल्हा रेशीम विकास अधिकारी जी. आर. कदम यांनी सांगितले.

परभणी, हिंगोली जिल्ह्यातील तुती लागवड नोंदणी स्थिती (एकरांत)

तालुका नोंदणी

परभणी ३९

जिंतूर ६७

सेलू ९

मानवत ८५

पाथरी १५

सोनपेठ ५

गंगाखेड ५१

पालम १५

पूर्णा १५७.

हिंगोली २५

कळमनुरी ७५

वसमत १००

औंढा नागनाथ १००

सेनगाव ५८

हिंगोली जिल्ह्यात ४०० एकर लागवड

‘‘हिंगोली जिल्ह्यात रेशीम विभागाला २५० एकर, कृषी विभागाला ३०० एकर, जिल्हा परिषदे अंतर्गत ग्रामपंचायत विभागाला २०० एकर असे एकूण ७५० एकरांवर तुती लागवडीचे उद्दिष्ट होते. परंतु केवळ रेशीम विभागा अंतर्गत ३५८ एकरांवर तुती लागवडीसाठी नोंदणी झाली. जिल्ह्यात जुनी व नवीन मिळून सुमारे ४०० एकर तुती लागवड आहे,’’ असे जिल्हा रेशीम विकास अधिकारी पी. एस. देशपांडे यांनी सांगितले.