Animals Food Infection : कोल्हापुरातील ८ जनावरांचा मृत्यू; पिंजार आणि उसाच्या वाड्यातून विषबाधा

Kolhapur Gokul Dudh Sangh : कोल्हापूर जिल्ह्याच्या कागल तालुक्यातील कुरुकली, बानगे येथील ८ जनावरांचा मृत्यू झाल्याप्रकरणी गोकुळ पशुखाद्यावर आरोप करण्यात आले होते. मात्र, जनावरांचा मृत्यू पिंजार आणि उसाच्या वाड्यातून विषबाधा होऊन झाला आहे. औंध (जि. पुणे) येथील शासकीय प्रयोगशाळेत शासनाकडून पाठविलेल्या 'व्हिसेरा'चा अहवाल प्राप्त झाला आहे. त्यानुसार ही वस्तुस्थिती पुढे आली आहे.

याबाबत गोकुळ दूध संघाचे कार्यकारी संचालक योगेश गोडबोले यांनी दिलेल्या माहितीनुसार, "पिंजार आणि उसाच्या वाड्यातून विषबाधा झाल्यामुळे मृत्यू झाल्याचे आता स्पष्ट झाले आहे. त्यामध्ये 'गोकुळ' 'च्या महालक्ष्मी पशुखाद्याचा कोणताही दोष नाही. तसेच खाद्यातील युरियाही तपासला असून, तो नियमाप्रमाणे आहे. दूध उत्पादकांच्या नुकसानीबाबत येत्या आठवड्यात होणाऱ्या संचालक मंडळाच्या बैठकीत काय मदत करायची, याबाबतचा निर्णय घेण्यात येणार आहे". अशी माहिती गोडबोले यांनी दिली.

मागच्या १० दिवसांत एकूण आठ जनावरांचा मृत्यू झाला आहे. परिसरातील जनावरांची काळजी घेण्यासाठी कोल्हापूर जिल्हा सहकारी दूध उत्पादक संघा (गोकुळ) ने डॉक्टरांचे पथक तैनात ठेवले आहे. त्यांनी आजपर्यंत २३१ जनावरांवर मोफत उपचार केले आहेत.

जनावरांच्या मृत्यूनंतर संबंधित शेतकरी हे 'गोकुळ'चे उत्पादक सभासद असल्यामुळे तेथे मोफत उपचार दिले आहेत. मात्र, मृत्यूचे कारण स्पष्ट झाले नसल्यामुळे संभ्रमावस्था निर्माण झाली होती. ही संभ्रमावस्था आता शासकीय अहवाल आल्यामुळे संपली आहे. मात्र, या दूध उत्पादक सभासदांना कोणतीही नुकसान भरपाई अद्याप दिलेली नाही.