E Peek Pahani : लोहारा तालुक्यात ७८ टक्के ई-पीकपाहणी

Latest Agriculture News : अवर्षण, अतिवृष्टी, नैसर्गिक आपत्ती आदींमुळे होणाऱ्या पिकांच्या नुकसान भरपाईपोटी शासन अनुदान, पीकविम्यापासून वंचित राहू नये, यासाठी शेतकऱ्यांनी ई-पीकपाहणी करून घेणे आवश्यक आहे.

आतापर्यंत ७८.२९ टक्के शकऱ्यांनी नोंदणी केली आहे. मात्र तांत्रिक अडचणीमुळे अद्यापही जवळपास २२ टक्के शेतकऱ्यांनी आपल्या पिकांची ई-पीक पाहणी केली नाही. नसल्याचे महसूल प्रशासनाच्या अहवालातून उघड झाले आहे.

तालुक्यात यंदा पावसाने उशिरा हजेरी लावल्यामुळे तब्बल एक महिन्यानंतर खरिपाची पेरणी झाली खरी पण मोठा पाऊस काही झाला नाही. मात्र ऐन मोसमाच्या काळात पावसाने तब्बल २८ दिवस उघडीप दिल्याने बहुतांश हलक्या जमिनीवरील पिके करपली. नैसर्गिक आपत्तीमुळे होणाऱ्या पिकांच्या नुकसान भरपाईपोटी शासन अनुदान देते.

त्यासाठी ई-पीक पाहणी करणे आवश्यक आहे. त्यानुसार दोन महिन्यापासून ई-पीक पाहणीस सुरवात झाली. शासनाने नोंदणीसाठी ३० सप्टेंबरपर्यंत अंतिम मुदत दिली होती. परंतु काही तांत्रिक अडचणीमुळे शेतकऱ्यांना मुदतीच्या आत ई-पीक पाहणी नोंदणी करता आली नाही.

तालुक्यातील बऱ्याच शेतकऱ्यांची अद्यापही ई - पीक पाहणी झाली नाही. बाब लक्षात घेत, प्रशासनाकडून १५ ऑक्टोबरपर्यंत ई-पीक पाहणी मुदतवाढ देण्यात आली आहे. मुदतवाढ मिळाली असल्याने या मुदतवाढीचा फायदा घेत शेतकरी आपल्या पिकांची ई-पाहणी करतील अशी आशा प्रशासनाला आहे. ई-पीक पाहणीची वेळेत नोंद न केलेले शेतकरी नुकसान भरपाईपासून वंचित राहू शकतात.