Water Storage : जालना जिल्ह्यात ४९ टक्के उपयुक्त पाणीसाठा

Jalna News : पावसाअभावी कोरडे पडलेल्या मध्यम व लघू प्रकल्पांमध्ये पाण्याची आवक सुरू झाली. परिणामी महिनाभरापूर्वी जिल्ह्यातील सात मध्यम व ५७ लघू प्रकल्पांमध्ये केवळ दोन टक्के उपयुक्त पाणीसाठा होता. तो आजघडीला ४९.३८ टक्क्यांवर गेला आहे. त्यामुळे जिल्ह्यातील पाणीप्रश्न मार्गी लागला आहे.

जिल्ह्यात सात मध्यम व ५७ लघू प्रकल्प आहेत. या प्रकल्पांमध्ये महिनाभरापूर्वी पावसाअभावी केवळ दोन टक्के उपयुक्त पाणीसाठा शिल्लक होता. त्यामुळे ऑगस्ट महिन्यामध्येही जिल्ह्यात टॅंकर सुरू होते. मात्र, मागील पंधरा दिवसांमध्ये जिल्ह्यात झालेल्या जोरदार पावसानंतर मध्यम व लघू प्रकल्पांमध्ये पाण्याची आवक सुरू झाली आहे. त्यामुळे पाणीसाठ्यात भर पडत असून आजघडीला ४९.३८ टक्के पाणीसाठा झाला आहे.

यामध्ये सात लघुप्रकल्पांमध्ये ४३.९७ टक्के उपयुक्त पाणीसाठा झाला आहे. यामध्ये भोकरदन तालुक्यातील धामना आणि अंबड तालुक्यातील गल्हाटी मध्यम प्रकल्प शंभर टक्के भरला आहे. तर, भोकरदन शहराला पाणीपुरवठा करणारा कोरडा पडलेल्या जुई मध्यम प्रकल्पात ३४.८३ टक्के उपयुक्त पाणीसाठा झाला आहे.

याशिवाय जालना तालुक्यातील कल्याण गिरिजा प्रकल्पात ३६.९२, जाफराबाद तालुक्यातील जीवरेखा मध्यम प्रकल्पात ३४.२६ टक्के पाणीसाठा झाला आहे. तर, ५७ लघू प्रकल्पांमध्ये ५१.५७ टक्के उपयुक्त पाणीसाठा झाला आहे. यामध्ये २५ टक्क्यांपर्यंत ११, २६ ते ५० टक्क्यांपर्यंत १०, ५१ ते ७५ टक्क्यांपर्यंत ७ आणि ७६ ते १०० टक्क्यांदरम्यान २२ लघुप्रकल्पांमध्ये पाणीसाठा झाला आहे. त्यामुळे जिल्ह्यात पाणीटंचाईचा प्रश्न संपुष्टात आल्याचे चित्र आहे.

दोन मध्यम प्रकल्प जोत्याखालीच

जिल्ह्यात सात मध्यम प्रकल्पांपैकी दोन मध्यम प्रकल्पाची पाणीपातळी ही जोत्याखाली आहे. यामध्ये जालना तालुक्यातील कल्याण मध्यम प्रकल्प आणि बदनापूर तालुक्यातील अपर दुधना प्रकल्पाचा समावेश आहे.