Agriculture Sowing: शिरूरमध्ये ४७ टक्के पेरण्या पूर्ण

Kavathe Yemai News: पावसाने काहीशी उघडीप दिल्याने शेतीकामांसाठी लगबग वाढली आहे.शिरूर तालुक्यात खरीप पेरणी तसेच मशागतींची कामे युद्धपातळीवर सुरू आहेत. तालुक्यात सुमारे ४७ टक्के क्षेत्रावर पेरणी झाल्याने शेतशिवारे गजबजली आहेत. वरुणराजाच्या कृपेमुळे उत्पन्नवाढीसाठी शेतकऱ्यांच्या आशा पल्लवीत झाल्या आहेत.

शिरूर तालुक्यातील बहुतांश भागांत यंदा मॉन्सूनपूर्व पावसाने जोरदार हजेरी लावली. यामुळे काही प्रमाणात पिकांचे नुकसान झाले. तसेच पूर्व मशागत कामांनाही त्याचा मोठा फटका बसला. मात्र, गेल्या आठवडाभरापासून पावसाने उसंत घेतल्याने शेतकरी पुन्हा पेरणीत व्यग्र झाले आहेत.

आतापर्यंत तालुक्यात कडधान्य व तृणधान्य पिकांच्या १२ हजार १६७ हेक्टर क्षेत्रावर म्हणजेच तब्बल ४६.९८ टक्के क्षेत्रावर पेरण्या पूर्ण झाल्या असल्याची माहिती तालुका कृषी अधिकारी सुवर्णा आदक यांनी दिली. बाजरी, मका या तृणधान्य पिकांची पेरणी आठ हजार ९४१ हेक्टरवर पूर्ण झाली आहे. जी सरासरी १५ हजार ३०४ हेक्टर क्षेत्राच्या तुलनेत समाधानकारक आहे.

कडधान्यांमध्ये तूर, मूग, उडीद, मटकी, वाटाणा, हुलगा, चवळी, वाल, घेवडा या पिकांची सरासरी १० हजार ५९२ हेक्टर क्षेत्रापैकी सुमारे ३ हजार २२७ हेक्टरवर पेरणी पूर्ण झाली आहे. तसेच पारंपरिक पीक पद्धतीला काहीसा फाटा देत तालुक्यातील तांदळी, मांडवगण फराटा, गणेगाव दुमाला, बाभूळसर बुद्रुक, वडगाव रासाई, इनामगाव, शिरसगाव काटा या भागांतील शेतकरी कापसाच्या पिकाला पसंती देत आहे. तर टाकळी हाजी, कान्हूर मेसाई, कवठे येमाई, मलठण परिसरातील शेतकरी सोयाबीनकडे वळाले आहेत.