Agricultural Deals : जिल्हास्तरीय खरेदीदार-विक्रेता संमेलनात पंचवीस करार

Parbhani News : बाळासाहेब ठाकरे कृषी व्यवसाय व ग्रामीण परिवर्तन (स्मार्ट) प्रकल्पांतर्गत बुधवारी (ता. २५) परभणी येथे जिल्हास्तरीय खरेदीदार-विक्रेता संमेलन पार पडले. या संमेलनात शेतकरी उत्पादक कंपन्या आणि खरेदीदार कंपन्या यांच्यामध्ये सोयाबीन, हरभरा, नैसर्गिक गूळ, तूर आदी शेतीमालाचे २५ करार झाले.

अध्यक्षस्थानी जिल्हाधिकारी रघुनाथ गावडे होते. जिल्हा अधीक्षक कृषी अधिकारी अनिल गवळी, स्मार्टचे लातूर विभागीय नोडल अधिकारी भास्कर कोळेकर, उपविभागीय कृषी अधिकारी आर. बी. हारणे, मूल्यमापन तज्ज्ञ (लातूर) सतीश महारनवर एडीएम लातूरचे वरिष्ठ व्यवस्थापक अमोल धवन,

वसमत येथील हळद संशोधन केंद्राचे तंत्र अधिकारी रमेश देशमुख, वसंतराव नाईक मराठवाडा कृषी विद्यापीठातील कृषी अर्थशास्त्रज्ञ डॉ. सचिन मोरे, क्षेत्र व्यवस्थापक डॉ. तुकाराम भुक्तार, कळमनुरी येथील दत्तगुरू शेतकरी उत्पादक कंपनीचे संचालक गंगाधर शृंगारे, सेलू येथील समर्थ अॅग्रो इंडस्ट्रीजचे संचालक रामेश्‍वर राठी, नोडल अधिकारी आबासाहेब देशमुख, शुभम उप्परवाड आदी उपस्थित होते.

गावडे म्हणाले, की शेतकरी उत्पादक कंपन्यांनी एकत्र येऊन शेतमालाची मूल्यसाखळी विकसित करावी. परभणी जिल्ह्यातील सर्व समुदाय आधारित संस्था व करारनामा झालेले खरेदीदार सोबतच इतर खरेदीदार यांना एकाच व्यासपीठावर आणून खरेदी-विक्रीबाबत चर्चा घडवून सर्व समुदाय आधारित संस्थांचे शेतकरी सभासदांच्या मालावर प्रक्रिया करणे, बाजारपेठ उपलब्ध करून देणे, सोबतच स्मार्ट प्रकल्पांतर्गत अनुदान देऊन शेतकरी व समुदाय आधारित संस्था यांना पाठबळ देणे या उद्देशाने हे संमेलन घेण्यात आले.

या संमेलनात एकूण ३५ शेतकरी उत्पादक कंपनी चे १०५ विक्रेता संचालक, तर ३५ खरेदीदार सहभागी झाले होते. शेतकरी उत्पादक कंपनी आणि खरेदीदार कंपनी यांच्या मध्ये सोयाबीन, हरभरा, नैसर्गिक गूळ, तूर आदी शेतीमालासह मसाले लाकडी घाण्यावर निर्मित तेल कुक्कुटपालन अंडी यांचे एकूण २५ खरेदीदार-विक्रेता करार करण्यात आले. शेतकरी उत्पादक कंपनीचे विविध प्रक्रिया केलेले, उत्पादित केलेले कृषी मालाचे स्टॉल ही लावण्यात आले होते.