Lumpy Disease: सोलापूर जिल्ह्यात१५ लाखांच्या लशींची खरेदी

Solapur News: जिल्ह्यात मागील महिन्यापासून पशुधनामध्ये लम्पी आजाराचा प्रादुर्भाव झाला आहे. जिल्हा परिषदेच्या पशुसंवर्धन विभागाकडून पशुधनाच्या लसीकरणाची मोहीम राबविली जात आहे. लम्पी आजार संसर्गजन्य असल्याने त्याच्या प्रतिबंधासाठी सर्व पशुपालकांनी पशुधनाचे लसीकरण करून घ्यावे.

लस खरेदीसाठी जिल्हा परिषदेच्या स्व-निधीमधून १५ लाखांचा निधी देऊन लस खरेदी केली आहे. सध्या लसीकरण मोहीम वेगाने सुरू असल्याची माहिती प्रभारी जिल्हाधिकारी तथा मुख्य कार्यकारी अधिकारी कुलदीप जंगम यांनी दिली.

श्री. जंगम म्हणाले, की पशुधनाची तसेच गोठ्याची स्वच्छता करावी. जिल्ह्यात एक महिन्यापासून १ हजार ५४४ गायींना लम्पीची लागण झाली होती. त्यापैकी १ हजार १०८ पशुधन बरे झाले असून आतापर्यंत ३३ पशुधनाचा लम्पी आजारामुळे मृत्यू झाला आहे. सध्या जिल्ह्यात ४०३ पशुधनावर उपचार सुरू आहेत.

प्रशासनामार्फत लम्पी आजार प्रतिबंधासाठी पशुधनाला लस देण्यात येत आहे. माळशिरस तालुक्यात बाधित पशुधनाचे प्रमाण जास्त होते, परंतु मागील काही दिवसांपासून संसर्ग होण्याचे प्रमाण कमी झाले आहे. सध्या माढा तालुक्यात बाधित पशुधनाची संख्या वाढत आहे.