MGNREGA Wages : सातारा जिल्ह्यात 'मनरेगा'च्या मजुरांची १५ कोटींची मजुरी थकली

Nashik News : महात्मा गांधी राष्ट्रीय ग्रामीण रोजगार हमी योजनेअंतर्गत (मनरेगा) जिल्ह्यातील मजुरांची १५ कोटी ३४ लाख ८४ हजार ८०५ रुपयांची मजुरी शासनाकडे थकित आहे. विशेष म्हणजे सिन्नर, सुरगाणा व येवला या तालुक्यांचे नोव्हेंबर-डिसेंबरपासूनचे अनुदान आलेले नाही. परिणामी काम करूनही मजुरी वेळेत हाती पडत नसल्याने मजुरांना हालअपेष्टा सहन कराव्या लागत आहेत.

सरकारतर्फे मनरेगा योजनेतून ग्रामीण भागातील मजुरांना किमान शंभर दिवसांचा रोजगार उपलब्ध करून देण्यात येतो. यंत्रणा स्तरावर व ग्रामपंचायत पातळीवर कामे हाती घेताना त्यावर मजुरांची नियुक्ती केली जाते.

प्रामुख्याने रस्त्यांची कामे, विहीर बांधणी, रोपवाटिका उभारणे, गोट फार्म, वृक्ष आणि फळबागा लागवड, घरकुल, शौचालये बांधणी, गाळ काढणे, अंगणवाडी भवन बांधणे यासह निरनिराळ्या प्रकारच्या कामांवर हे मजूर कार्यरत असतात.

सरकारतर्फे या मजुरांना २२० रुपये प्रतिदिन मजुरी देण्यात येते. गावपातळीवर कामे उपलब्ध होत असल्याने संपूर्ण कुटुंब मनरेगावर हजेरी लावते. मात्र, केंद्र सरकारकडून मजुरी वेळेत उपलब्ध होत नसल्याने मजुरांना आर्थिक संकटाला तोंड द्यावे लागते आहे.

राज्यात गेल्या वर्षी पार पडलेल्या लोकसभा व त्यानंतरच्या विधानसभा निवडणुकांपासून मनरेगा अनुदान उशिराने प्राप्त होत आहे. अद्याप हा गुंता सुटलेला नाही, मागील महिन्याचे अनुदान जिल्ह्याला प्राप्त होणे बाकी आहे.

सरकारकडून टप्प्याटप्प्याने हे अनुदान वितरित केले जात आहे. लवकरच सर्व अनुदान उपलब्ध होईल, असे जिल्हा प्रशासनाकडून सांगण्यात येत आहे. मात्र, रोजगाराची हमी देणारे शासनच विलंबाने अनुदान देत असल्याने घरातील चूल कशी पेटवायची, असा प्रश्न मजुरांना भेडसावत आहे.

जिल्ह्यातील ‘मनरेगा’ची स्थिती

तालुका थकित रक्कम (कोटींत)

बागलाण १,२५,४१,७४३

चांदवड १५,७८,६६७

देवळा ३९,६३,३४८

दिंडोरी १,०१,४८,९७६

इगतपुरी १,०२,२२,१६७

कळवण ६९,३९,८६५

मालेगाव २,१७,३६,९९१

नांदगाव ४७,१२,४८०

नाशिक ४५,७८,१५३

निफाड १,४९,३९,६७५

पेठ १,६२,४१,६०७

सिन्नर ५९,३८,४५७

सुरगाणा २,१४,४४,३१८

त्र्यंबकेश्वर ६८,१७,६८६

येवला १,१६,८०,६७२