Farmers Issue : शेतकरी, युवकांच्या प्रश्नावर युवक काँग्रेसचा उद्या विधिमंडळाला घेराव

Pune News पुणे : युवकांमधील बेरोजगारी (Unemployment), विद्यार्थ्यांचे प्रश्न, शेतकऱ्यांच्या समस्या (farmers Issue) याकडे सरकारचे लक्ष वेधण्यासाठी महाराष्ट्र प्रदेश युवक काँग्रेसच्या वतीने सोमवारी (ता. २०) विधिमंडळाला घेराव घालण्यात येणार आहे.

राज्यभरातून २० ते २५ हजार युवक या आंदोलनात सहभागी होणार आहेत, अशी माहिती युवक काँग्रेसचे महाराष्ट्र प्रभारी मितेंद्र सिंग व प्रदेशाध्यक्ष कुणाल राऊत यांनी काँग्रेस भवन येथे पत्रकार परिषदेत दिली.

प्रदेश युवक काँग्रेसचे उपाध्यक्ष शिवराज मोरे, प्रशांत ओगले, महिला उपाध्यक्षा सोनलक्ष्मी घाग, प्रदेश सरचिटणीस प्रथमेश आबनावे, अक्षय जैन, प्रदेश प्रवक्ते दीपक राठोड, पुणे शहराध्यक्ष राहुल शिरसाट आदी उपस्थित होते.

मितेंद्र सिंग म्हणाले, की युवक आणि शेतकऱ्यांच्या हक्कासाठीच्या या लढाईत प्रत्येक तालुक्यातून तरुण सहभागी होणार आहेत. कुणाल राऊत म्हणाले, की राज्य सरकारचे युवकांकडे दुर्लक्ष झाले आहे.

महाभरती, एमपीएससी यासोबतच विद्यार्थी आणि युवकांबद्दल राज्य सरकार चुकीची धोरणे राबवित आहे. महाराष्ट्रातील अनेक बडे प्रकल्प राज्याबाहेर जात आहेत. परिणामी बेरोजगारी वाढत आहे. इतर राज्यांत बेरोजगार भत्त्याची तरतूद आहे. ही तरतूद महाराष्ट्रातही व्हायला हवी.