Water Crisis : शेतकऱ्यांपुढे जीवन-मरणाचा प्रश्‍न

Nira Narsinhpur News : इंदापूर तालुक्यातील शेतीसाठी वरदान ठरलेली नीरा नदी व त्यावरील बंधारे ऐन पावसाळ्यात कोरडे पडले आहेत. यामुळे शेतकऱ्यांमध्ये चिंतेचे वातावरण पसरले आहे. जनावरे आणि शेती वाचविण्यासाठी वीर धरणातून नीरा नदीत पाणी सोडण्याची मागणी नागरिक व शेतकऱ्यांकडून होत आहे.

पाणी सोडले नाही तर मात्र शेतकऱ्यांच्या जीवन-मरणाचा प्रश्न निर्माण होईल.नीरा नदीवर असणाऱ्या जवळपास सर्वच धरणांमध्ये ८० ते ८५ टक्के पाणीसाठा झाला आहे. धरणातून नीरा नदीत पाणी सोडावे, असे मागणी शेतकरी व नागरिकांकडून वारंवार करण्यात येत आहे.

पावसाळा चालू होऊन चार महिने झाले असताना मात्र, पावसाचा एक थेंबही पडला नाही. नीरा नदीमध्ये तर चिमणीला पिण्यासाठीही पाणी नाही. त्यामुळे गुरे, ढोरे सोडून द्यायची वेळ शेतकऱ्यांवर आली आहे.

नीरा नदीला जर पाणी सोडले नाही तर मात्र पाणी व चाऱ्याअभावी शेती व जनावरे सोडून देण्याची वेळ आली आहे. तरीही सरकारने लक्ष दिले नाही तर मात्र आत्महत्या करण्याशिवाय पर्याय नसल्याची प्रतिक्रिया मोहन शिवाजी खाडे, ज्ञानदेव नाना हेगडकर या शेतकऱ्यांनी व्यक्त केली आहे.

जनावरांस सोडण्याची शेतकऱ्यांवर वेळ

राज्यातील शिंदे फडणवीस पवार सरकारने ही बाब गांभीर्याने घेतली नाही. तर शेतकऱ्यांना हातची पिके जळताना पहावी लागणार आहे. शेतकऱ्यांवर लाखो रुपयांची जनावरे सोडून द्यावी लागण्याची वेळ आली आहे. खासदार सुप्रिया सुळे व आमदार दत्तात्रेय भरणे यांनी याकडे लक्ष देण्याची मागणी शेतकरी व नागरिकांनी केली आहे.

पावसाची दडी

प्रतिवर्षी धरणाचा पाणलोट क्षेत्रातील पाऊस १५ ऑगस्टपर्यंत कमी होत असतो. त्यामुळे १५ ऑगस्टनंतर नीरा नदीवर असणारे सर्व बंधारे ढापे टाकून पाण्याने पूर्ण भरून घेतले जातात. मात्र, यावर्षी अद्यापही पावसाने दडी मारल्याने नीरा नदीत पाणी सोडले गेले नसल्याने नदीवरील नरसिंहपूरपासून खोऱ्यापर्यंतचे अनेक बंधारे कोरडे पडले आहेत.