Sugarcane Farming : विदर्भात ऊस शेतीसाठी व्हिएसआय करणार शेतकऱ्यांना मदत

Sugarcane Farming : विदर्भातील शेतकऱ्यांना उसाचे पीक घेण्यासाठी वसंतदादा शुगर इन्स्टिट्यूट (Vasantdada Sugar Institute) (व्हिएसआय) मदत करणार आहे.

ऊस शेतीला प्रोत्साहन देऊन विदर्भातील शेतकऱ्यांच्या आत्महत्या (Farmer Suicide) बऱ्याच अंशी रोखल्या जाऊ शकतात, असे राष्ट्रवादी काँग्रेसचे अध्यक्ष शरद पवार (Sharad Pawar) यांनी म्हटले आहे. नागपूर येथे पवार यांनी पत्रकारांशी संवाद साधला त्यावेळी ते बोलत होते.

दोन दिवसांच्या विदर्भ दौऱ्यावर आलेल्या पवारांनी शनिवारी (ता. १) केंद्रीय मंत्री नितीन गडकरी यांची त्यांच्या निवासस्थानी भेट घेतली. यावेळी पवार म्हणाले की, वेगवेगळ्या पिंकाची लागवड केल्यास शेतकरी संकटातून वाचविले जाऊ शकते.

विदर्भातील शेतकरी प्रदीर्घ काळापासून विदर्भातील शेतकरी कापूस आणि सोयाबीन ही पिके घेत असून त्याचे समाधानकारक परिणाम दिसत नाहीत.

वसंतदादा शुगर इन्स्टिट्यूट या भागातली शेतकऱ्यांना उसाची शेती आणि उपपदार्थ निर्मिती कशी करायची, यासाठी प्रशिक्षण देईल. यामुळे शेतकऱ्यांच्या आत्महत्या कमी होतील, असे मला वाटते.

उसापासून साखरेसोबतच इथेनॉलचेही उत्पादन आपण करू शकतो. जर मराठवाडा, खानदेशातील शेतकरी उसाचे पीक घेऊ शकतात, तर विदर्भातील शेतकरी का घेऊ नाही शकत, असेही पवार यावेळी म्हणाले.

दरम्यान, गडकरी यांनी 'व्हीएसआय'चे उपकेंद्र विदर्भात व्हावे, यासाठी आग्रह धरला होता. यासाठी त्यांनी १०० एकर जमिनीची पाहणीही केली. ज्यावर व्हिएसआयचे उपकेंद्र विकसित केले जाऊ शकते.