Turmeric Harvesting : हळदीचे पीक काढणीसाठी तयार

Turmeric Crop Farming शिरपूर जैन, जि. वाशीम ः जिल्ह्यात हळदीचे आगार (Turmeric Hub) म्हणून ओळख बनलेल्या शिरपूर व परिसरात हे पीक काढणीसाठी (Turmeric Harvesting) तयार होत आहे. काही शेतांमध्ये हळद परिपक्व झाली असून काढणीला प्रारंभही झाला. सार्वत्रिक स्वरूपाची काढणी लवकरच सुरू होणार आहे.

शिरपूर परिसरात हळदीचे मोठ्या प्रमाणात पीक घेतले जाते. हळद परिपक्व झाल्याने काही शेतकऱ्यांनी काढणीला सुरुवात केली आहे. हळद हे मसालावर्गीय नगदी पीक म्हणून मानले जाते.

बहुतांश शेतकऱ्यांच्या शेतात पाण्याच्या उपलब्धतेनुसार हळद लागवडीकडे गेल्या काही वर्षात कल वाढला. दर वर्षी सोयाबीन, हरभरा, गहू, तूर ही पारंपरिक पिके घेतानाच काही क्षेत्रात हळद लावली जाते.

आता तर या भागात हळद हे नगदी पीक म्हणून पाहिले जात आहे. यंदाच्या वर्षात लागवड केलेली हळद आता परिपक्व होत आहे. बऱ्याच शेतकऱ्यांनी हळद काढणीला सुरुवात केली.

हळद काढणीनंतरची बरीच प्रक्रिया किचकट राहते. हळद तयार करण्यासाठी फार मोठी मेहनत आहे. हळद काढून झाल्यानंतर उकळणे, वाळवणे, पॉलिशिंग केली जाते. त्यानंतर विक्रीसाठी तयार होत असते.

या भागात हळदीचे सर्व साधारणपणे २५ ते ३० क्विंटल एकरी उत्पादन होते. बाजारात दर मिळाला तर शेतकऱ्यांना मोठा हातभार मिळतो.

जून-जुलैमध्ये लागवड करण्यात आलेली हळद काढणीला तयार झाल्याने मजुरांच्या उपलब्धतेनुसार काढणीची आता पुढील महिनाभर लगबग राहणार आहे.

सध्या परिसरातील हळद सुकली असून पालापाचोळा वाळला आहे. लवकरच हळद काढणीचा हंगाम आता वेग घेणार आहे.