Chhatrapati Sambhaji Nagar : लांबलेल्या पावसाने छत्रपती संभाजीनगर जिल्ह्यातील टोमॅटो आगारात लागवडीला विलंब झाला आहे. त्याचा थेट परिणाम हंगाम लांबणीवर पडण्यावर झाला.
अनेक ठिकाणी अजून लागवड सुरूच असून काही ठिकाणी टोमॅटो पीक फुलोऱ्यात आहे. त्यामुळे टोमॅटोला बाजारात चांगला दर मिळत असला तरी अपवाद वगळता बहुसंख्य शेतकऱ्यांच्या हातात अजून उत्पादनच सुरू झाले नसल्याची स्थिती आहे.
छत्रपती संभाजीनगर जिल्ह्यातील माळीवडगाव, गवळीशिवरा, गाजगाव, आंबेलोहळ, देभेगाव, ताडपिंपळगाव, देवळाना, कन्नड, अंधानेर, बहिरगाव यासह वरुडकाजी, हिरापूर, महालपिंपरी, शेंद्रा, कच्ची घाटी आदी परिसरात मोठ्या प्रमाणात टोमॅटोची लागवड केली जाते. साधारणतः मे महिन्याच्या अखेरीस सुरू होणारी ही लागवड १० जूनपर्यंत आटोपत असते.
परंतु यंदा लांबलेल्या पावसाने टोमॅटो रोप लागवडीत खोडा घातला आहे. शिवाय दर वाढल्याने शेतकऱ्यांचा कल टोमॅटो लागवडीकडे वाढल्याने रोप मिळण्याची ही अडचण झाली आहे. त्यामुळे जूनच्या १५ तारखेपर्यंत सुरू राहणारी लागवड जुलैची १५ तारीख आली तरी सुरू असल्याची स्थिती आहे.
माळीवाडगाव गवळीशिवरा गाजगाव आदी परिसरात २५ मे ते पाच जून दरम्यान लागवड झालेले टोमॅटोचे पीक आता फुलाच्या अवस्थेत आहे. या पिकासह त्यानंतर लागवड झालेल्या टोमॅटो पिकावर कीड रोगाचा प्रादुर्भावही मोठ्या प्रमाणात वाढला आहे. त्यावर नियंत्रण मिळवण्याची कसरत टोमॅटो उत्पादकांना करावी लागते आहे.
आणखी साधारणतः २० ते २५ दिवसांनी काही शेतकऱ्यांच्या शेतातील टोमॅटो उत्पादन सुरू होईल. हंगाम जोमात सुरू व्हायला किमान एक महिन्यापेक्षा जास्त अवधी लागू शकतो असं शेतकरी सांगतात. त्यामुळे टोमॅटो बाजारात भाव खात असला तरी शेतकऱ्यांच्या पदरात मात्र त्यामधून काही पडण्याची आशा तूर्त तरी नाही.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.