Tomato Rate : चिपळूणमध्ये टोमॅटो १२० रुपये किलो

Ratnagiri News : काही आठवडेआधी स्थानिक बाजारात २० ते ३० रुपये किलोने मिळणारा टोमॅटो आता १२० रुपये किलोपर्यंत पोहोचला आहे. बाजारात आवक कमी झाल्याने टोमॅटो दराने उच्चांक गाठला असून, अन्य भाज्यांच्या दरातही सुधारणा झाली आहे.

गेल्या काही दिवसांपासून भाज्यांच्या दरात चांगली सुधारणा झाली आहे. चिपळूण बाजारपेठेत सध्या टोमॅटो शंभरी पार करत भाव खात आहे. येथील बाजारपेठेत पाटण, कराड, पुणे, सांगली, मिरज, आष्टा, सातारा, कोल्हापूर येथून भाज्यांची आवक होते. सध्या घाटमाथ्यावर पावसाचे प्रमाण कमी असल्याने त्याचा फटका भाजी उत्पादनाला बसला आहे.

चिपळूण बाजारपेठेत आवक कमी झाल्याने गेल्या महिन्यापासून भाज्यांच्या दरात सुधारणा झाली आहे. साधारण ४० ते ६० टक्के तर काही ठिकाणी भाज्यांचे दर शंभर टक्के वाढले आहेत.

सध्या येथील बाजारपेठेत टोमॅटो १२० रुपये किलो, वांगी ४० रुपये, भेंडी ४० रुपये, कोबी ४० रुपये, फ्लॉवर ८० रुपये, शिमला मिरची ८० रुपये, गवार ६० ते ८० रुपये, फरसबी १०० रुपये, दोडकी ६० रुपये, कारली ६० रुपये, आले २०० ते २४० रुपये, मिरची १०० ते १२० रुपये, तोंडली ८० ते १०० रुपये, घेवडा ६० ते ८० रुपये, काकडी ४० रुपये, गाजर ८० रुपये, बीट ८० रुपये किलोने विक्री होत आहे.

कोथिंबीर ३० रुपये जुडी, मेथी ३० रुपये जुडी, पालक २० रुपये जुडी, अन्य पालेभाज्या १० रुपये जुडी, शेपू ५० रुपयांना दोन जुडी, कांदा ३० ते ३५ रुपये किलो, बटाटे ३० ते ३६ रुपये किलो तर लसूण २०० रूपये किलोने विक्री होत आहे. आवक घटल्याने भाज्यांच्या दरात सुधारणा झाल्याची माहिती स्थानिक भाजी व्यावसायिकांनी दिली.