Tur Market : तूर उत्पादनात यंदाही मोठ्या वाढीची आशा धुसरच

Pune News : मागील हंगामात देशातील तूर पिकाचे नुकसान झाल्यामुळे दरात मोठी तेजी आली. यंदाही महात्वाच्या तूर उत्पादक महाराष्ट्र आणि कर्नाटकात पावसाचे प्रमाण कमी आहे. यामुळे लागवडी सध्या निम्म्यापेक्षा कमी दिसतात. एकूणच यंदाही तुर उत्पादनासाठी अनुकूल स्थिती दिसत नसल्याचं जाणकार सांगत आहेत.

कृषी मंत्रालयाने दिलेल्या माहितीनुसार, देशात आतापर्यंत ४६ लाख ३२ हजार हेक्टरवर कडधान्य लागवड झाली. गेल्या हंगामात याच काळातील लागवड ५६ लाख ४३ हजार हेक्टरवर होती. म्हणजेच यंदा कडधान्य लागवड १८ टक्क्यांनी पिछाडीवर आहे. महाराषट्रात कडधान्या लागवड केवळ ४ लाक हेक्टरवर झाली. मागील हंगामात याच काळातील लागवड ९ लाख ४६ हजार हेक्टरवर होती. तर कर्नाटकातील लागवड यंदा ६ लाख हेक्टरवर पोचली. गेल्या हंगामातील लागवड १३ लाख हेक्टर होती.

या सोबत मध्य प्रदेशही कडधान्य लागवडीत महत्वाची भुमिका पार पाडते. मध्य प्रदेशात कडधान्य लागवडीची स्तिती काहीशी चांगली दिसते. पण लागवड गेल्यावर्षीपेक्षा कमीच आहे. मागील हंगामात मध्य प्रदेशात ९ लाख ५३ हजार हेक्टरवर कडधान्य लागवड होती. ती यंदा ८ लाख ६१ हजार हेक्टरवर पोचली. तेलंगणातील लागवडही कमीच आहे. तर उत्तर प्रदेशातील लागवड क्षेत्रात एक लाख हेक्टरने घट आहे.

सध्या तुरीच्या दरात मोठी तेजी आली आहे. देशात तुरीचा पुरवठा कमी असल्याने दर टिकून आहेत. तुरीचे दर कमी करण्यासाठी सरकारने आयात वाढवली, स्टॅक लिमिटही लावले. पण तूर पुरवठ्याची खरी भीस्त आहे ती देशातील उत्पादनावरच. त्यामुळे सरकारने चालू हंगामात देशातील तूर उत्पादन वाढीवर जोर दिला. त्यासाठी हमीभावाने शेतकऱ्यांकडून तूर खरेदीची मर्यादा काढली. आता शेतकरी कितीही तूर हमीभावाने विकू शकतात.

पण खरा प्रश्न आहे तो पावसाचा. देशातील महत्वाच्या तूर उत्पादक महाराष्ट्र आणि कर्नाटकात चांगला पाऊसच झाला नाही. त्यामुळे तूर लागवड पिछाडीवर आहे. गेल्या हंगामात देशात जुलै महिन्याच्या पहिल्या आठवड्यात १९ लाख ३४ हजार हेक्टरवर तूर लागवड झाली होती. तर यंदा केवळ १० लाख ३२ हजार हेक्टर तुरीखाली आले. पुढील काही दिवसांमध्ये महाराष्ट्र आणि कर्नाटकात चांगला पाऊस राहिला तरचं तूर उत्पादनाचं चित्र आशादायक ठरु शकतं. पण सध्याच्या परिस्थितीवरून यंदाही तूर उत्पादन कमीच राहील असं चित्र दिसतं.