Nagar News आई-वडील शेतात राबणारे. पोराने शिकून चांगली नोकरी मिळावी, अशी अपेक्षा करताना पोराने मात्र ‘एमपीएससी’ परीक्षेत (MPSC Exam) चांगलीच भरारी मारली आहे.
महात्मा फुले कृषी विद्यापीठातील (Mahatma Phule Agriculture University) वसतिगृहात राहून शिकणाऱ्या वेळापूर (ता. माळशिरस) येथील अनिकेत सिद्धेश्‍वर माने-देशमुख या विद्यार्थ्याने महाराष्ट्र लोकसेवा आयोगाच्या परीक्षेत राज्यात प्रथम क्रमांक मिळविला आहे. विद्यापीठासह राज्यभरात या शेतकऱ्याच्या पोराच्या यशाचे कौतुक होत आहे.
सोलापूर जिल्ह्यातील वेळापूर (ता. माळशिरस) येथील सिद्धेश्‍वर माने- देशमुख हे साधारण शेतकरी. पत्नी, एक मुलगा, एक मुलगी असा परिवार. पाच एक शेती.ते ऊस, मक्यासारखी पिके घेत शेतीत वेगवेगळे प्रयोग करतात.
एकुलत्या एक मुलाने शिकून चांगली नोकरी मिळवावी, यासाठी त्यास उच्च शिक्षण देण्याचा निर्णय त्यांनी घेतला. त्यानुसार राहुरी विद्यापीठात कृषी अभियांत्रिकीला प्रवेश घेतला. शिकता शिकता मुलगा अनिकेतने स्पर्धा परीक्षेचाही अभ्यास सुरू केला.
चार लाख विद्यार्थ्यांतून प्रथम
आधी दिलेल्या एका परीक्षेत थोडक्यात यश हुकले. मात्र २०२२ मध्ये राज्य उत्पादन शुल्क विभागातील दुय्यम निरीक्षक या पदासाठी झालेल्या परीक्षेत अनिकेतने कुठेही क्लास न करता आत्मविश्‍वासाच्या बळावर भरारी घेतली.
त्याने परीक्षेत राज्यात प्रथम क्रमांक मिळविला. या परीक्षेला राज्यातून जवळपास चार लाख विद्यार्थी बसले होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.