Kharif Sowing : लातूर, धाराशिव जिल्ह्यांत ११ लाख हेक्टरवर खरिपाची पेरणी

Latur News : मराठवाड्यातील लातूर व धाराशिव या दोन जिल्ह्यांत एकूण सर्वसाधारण क्षेत्राच्या तुलनेत पुढे जाऊन पेरणी झाली आहे. त्यामध्ये लातूर जिल्ह्यात सर्वसाधारण क्षेत्राच्या तुलनेत अपेक्षित पेरणी झाली नाही तर धाराशिव जिल्ह्यात सर्वसाधारण क्षेत्राच्या तुलनेत पुढे जाऊन पेरणी झाली आहे.

यंदाच्या खरीप हंगामासाठी लातूर व धाराशिव या दोन जिल्ह्यांत मिळून खरिपाचे सर्वसाधारण क्षेत्र ११ लाख ४ हजार १९१ हेक्टर इतके आहे. यामध्ये लातूरमधील ५ लाख ९९ हजार ४५६ हेक्टर, तर धाराशिवमधील ५ लाख ४ हजार ७३५ हेक्टर क्षेत्राचा समावेश आहे. लातूर जिल्ह्यात सर्वसाधारण क्षेत्राच्या तुलनेत ५ लाख ८० हजार ३१३ हेक्टर क्षेत्रावर खरिपाची पेरणी झाली आहे.

म्हणजे सर्वसाधारण क्षेत्राच्या तुलनेत लातूरमध्ये ९७ टक्के क्षेत्रावर पेरणी झाली असून, अजूनही तीन टक्के क्षेत्र पेरणीविना असल्याची स्थिती आहे. दुसरीकडे धाराशिव जिल्ह्यात सर्वसाधारण क्षेत्राच्या तुलनेत ५ लाख ३३ हजार ५०९ हेक्टरवर खरिपाची पेरणी झाली. म्हणजे सर्वसाधारण क्षेत्राच्या तुलनेत १०६ टक्के क्षेत्रावर खरिपाची पेरणी झाली आहे.

दोन जिल्ह्यातील पीकनिहाय पेरणी क्षेत्र (हेक्टरमध्ये)

पीक लातूर धाराशिव

भात ११० ४३

ख. ज्वारी ५०८० ६६४

बाजरी ७१० ८७४

मका २२०१ ६५२३

इतर तृणधान्य ४४५ १०३०

तूर ६३ हजार ८९५ ३१०३६

मूग ४५८१ ५२७७

उडीद २९६८ २५६८३

इतर कडधान्य ४८ ९०२

खरीप भुईमूग २४१ ४३३

तीळ २२१ १२९

कारळ ८० ११

सूर्यफूल १७ ००

सोयाबीन ४ लाख ९२ हजार १४४ ४ लाख ५९ हजार ९४३

इतर गळीतधान्य ३७ ४०२

कपाशी ७५३६ ५५९