Mahabeej : ‘महाबीज’ संचालकपदी सहाव्यांदा वल्लभराव देशमुख विजयी

महाराष्ट्र राज्य बियाणे महामंडळाच्या (महाबीज) (Mahabeej) दोन संचालक पदांसाठी झालेल्या निवडणुकीत वल्लभराव देशमुख (Vallabhrao Deshmukh) उर्वरित महाराष्ट्र मतदार संघातून विक्रमी सहाव्यांदा विजयी झाले. तर विदर्भ मतदार संघात डॉ. रणजित सपकाळ (Dr. Ranjit Sapkal) यांनी बाजी मारली. दोघांचे विजय अपेक्षित धरले जात होते.

गुरुवारी (ता. २२) सायंकाळी उशिरा या दोन्ही जागांचे निकाल जाहीर करण्यात आले. ‘महाबीज’च्या दोन संचालक पदांच्या निवडीसाठी अकोला (विदर्भ) आणि उर्वरित महाराष्ट्र अशा दोन मतदार संघात निवडणूक प्रक्रिया राबविण्यात आली होती. विदर्भ मतदार संघातून अकोला येथील खासदार संजय धोत्रे यांचे निकवर्तीय डॉ. रणजित सपकाळ यांनी ८९६२ मते घेत विजय मिळविला.

गुरुवारी (ता. २२) सायंकाळी उशिरा या दोन्ही जागांचे निकाल जाहीर करण्यात आले. ‘महाबीज’च्या दोन संचालक पदांच्या निवडीसाठी अकोला (विदर्भ) आणि उर्वरित महाराष्ट्र अशा दोन मतदार संघात निवडणूक प्रक्रिया राबविण्यात आली होती. विदर्भ मतदार संघातून अकोला येथील खासदार संजय धोत्रे यांचे निकवर्तीय डॉ. रणजित सपकाळ यांनी ८९६२ मते घेत विजय मिळविला.

त्यांनी अकोला येथीलच प्रशांत विश्वासराव गावंडे यांचा पराभव केला. गावंडे यांना दोन हजार ३२१ मते मिळाली. २०७ मते बाद ठरली. उर्वरित महाराष्ट्र मतदार संघातून बुलडाणा जिल्ह्यातील अमडापूर येथील वल्लभराव देशमुख यांनी विजय मिळविला. त्यांना ५६६६ मते मिळाली.

त्यांनी बीड जिल्ह्यातील ॲड. विष्णुपंत सुभानराव सोळंके यांचा पराभव केला. ॲड. सोळंके यांना ३३०९ मते मिळाली. या मतदार संघात २६५ मते बाद झाली. मतपत्रिकेद्वारे ही निवडणूक घेण्यात आली. यासाठी १४ सप्टेंबरपर्यंत मतपत्रिका स्वीकारण्यात आल्यानंतर अकोला येथील मुख्यालयात १५ सप्टेंबरपासून मतपत्रिकांची छाननी व पात्र मतपत्रिकांची यादी तयार करण्याचे काम सुरू होते.

बुधवारी (ता. २१) हे काम पूर्ण झाल्यानंतर गुरुवारी मोजणी करण्यात आली. सायंकाळपर्यंत चाललेल्या मतमोजणीनंतर निकाल जाहीर करण्यात आला. विजयानंतर समर्थकांनी जल्लोष केला.