Potato Farming : पावसाने सातगाव पठार परिसरातील बटाट्याला जीवदान

Pune News : आंबेगाव तालुक्यातील सातगाव पठार परिसरात गुरुवारी (ता.८) दुपारपासून भीज पावसाला सुरुवात झाली. शुक्रवारी (ता.९) पहाटे जोरदार पाऊस झाला. त्यामुळे सातगाव पठार भागातील पाच हजार एकर क्षेत्रातील बटाटा व दोन हजार एकर क्षेत्रातील अन्य पिकांना जीवदान मिळाले आहे.

बटाट्याचे आगर म्हणून राज्यात खरीप हंगामात बटाटा उत्पादनात सातगाव पठार परिसर प्रसिद्ध आहे. गेले अनेक दिवस पाऊस लांबणीवर पडल्याने शेतकरी वर्गात चिंतेचे वातावरण होते. गेले आठवडाभर पाऊस सतत हुलकावणी देत होता. गुरुवारी (ता.८) दुपारपासून भीज पावसाला सुरुवात झाली. सुरुवातीला पावसाचा जोर नव्हता. पण संध्याकाळी सहानंतर पावसाचा जोर वाढला.

विशेषता सातगाव पठार भागातील कुरवंडी, भावडी, थुगाव, कोल्हारवाडी, कारेगाव, पेठ, पारगावतर्फे खेड परिसरात समाधानकारक पाऊस सुरू झाल्याने शेतकरी वर्गात उत्साहाचे वातावरण आहे. बटाट्याप्रमाणेच जवळपास दोन हजार एकर क्षेत्रातील सोयाबीन, वटाणा, कोबी, फ्लावर, फारशी, तरकारी, भाजीपाला व आदी पिकांना पावसामुळे आधार मिळाला आहे. भावडी गावाजवळ वेळ नदीवर असलेला बंधारा पाण्याने तुडुंब भरून वाहत आहे.