Nagar News : पशुपालन, दूध व्यवसायात अग्रेसर असलेल्या आपल्या राज्यात गेल्या काही दिवसांपासून पशुपालक दुष्काळ, लम्पी, दुधाला मिळणारा कमी दर यामुळे शेतकरी त्रस्त आहेत. अशा संकटाच्या काळात त्यांना मदत करण्यासाठी राज्यात पशुवैद्यकीय सेवा मोफत करावी, अशी मागणी वंचित बहुजन आघाडीचे राज्य समन्वयक ॲड. अरुण जाधव यांनी केली.
‘‘मागणी जर सरकारने गांभीर्याने घेतली नाही, तर पशुसंवर्धनमंत्री राधाकृष्ण विखे यांच्या कार्यालयाच्या दारात ढोल बजाव आंदोलन करू,’’ असे ॲड. जाधव यांनी सांगितले.
ॲड. जाधव म्हणाले, ‘‘महाराष्ट्रासारख्या दुग्ध व्यवसायात अग्रेसर असणाऱ्या शेतकऱ्यांना सातत्याने अनेक संकटांना सामोरे जावे लागत आहे. अशा काळात शेतकऱ्यांना मदत करण्याची सरकारची भूमिका दिसली नाही.
मदत सोडा १२ वर्षांपासून शासनाचा पशुसंवर्धन विभाग पशुविषयक सेवांच्या नावाखाली वेगवेगळे कर वसूल करत आहे. राज्यात आणि देशात माणसांना विविध आरोग्य सेवा मोफत आहे. मात्र माणसांना जगविणाऱ्या पशूंना मोफत सेवा नाही.
तपासणी पत्रासाठी शुल्क नसले तरी उपचार, खच्चीकरण, रोग प्रतिबंधक लस, लहान मोठ्या शस्त्रक्रिया, कृत्रिम रेतन व आनुषंगिक सेवा, रोग नमुने तपासणी, रक्त व रक्तजल तपासणी, ‘क्ष’ किरण तपासणी, सोनोग्राफी व आरोग्य दाखले यासाठी मात्र वसुली केली जात आहे.’’
‘‘आधीच दुष्काळाने होरपळत असलेला शेतकरी या सेवा शुल्काने त्रासला आहे. पशुवैद्यकीय अधिकारी ग्रामीण भागात तपासणीला जाण्याच्या नावाखाली शेतकऱ्यांची लूट करत आहेत.
२०१० मध्ये जनावरांना कोणतीही सेवा एक रुपयांत मिळत होती. अशीच सेवा पुन्हा सुरू करून जनावरांना मोफत सेवा मिळावी. या मागणीकडे दुर्लक्ष केले तर पशुसंवर्धनमंत्र्यांच्या कार्यालयावर जनावरांसह ढोल बजाव आंदोलन करण्याचा इशारा ॲड. जाधव यांनी दिला.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
