Turmeric Quality : विकिरण तंत्रज्ञानाव्दारे हळदीची गुणवत्ता टिकविण्यासाठी प्रकल्प

Hingoli News : ‘‘जिल्ह्यातील वसमत येथील बाळासाहेब ठाकरे हळद (हरिद्रा) संशोधन व प्रशिक्षण केंद्र व मुंबई येथील भाभा अणु संशोधन केंद्र यांच्यात शुक्रवारी (ता. २) मुंबई येथे सामंजस्य करार करण्यात आला.

या करारानुसार विकिरण तंत्रज्ञानाचा वापर करून हळदीची गुणवत्ता टिकवून ठेवण्यासाठी आय रेडिएशन प्रकल्प सुरु करण्यात येणार आहे. त्यामुळे हळद निर्यातीस चालना मिळेल,’’ अशी माहिती हळद संशोधन व प्रशिक्षण केंद्राचे अध्यक्ष खासदार हेमंत पाटील यांनी दिली.

‘‘या प्रकल्पाचे लवकरच काम सुरु होईल. हळद निर्यातीला प्रोत्साहन देण्यासाठी हा प्रकल्प महत्त्वपूर्ण ठरेल. या प्रकल्पाची क्षमता प्रतिदिन १०० टन इतकी आहे. या तंत्रज्ञानाचा हळदीसोबतच इतर मसाले पिकांना देखील उपयोग होईल.

या वेळी ‘ब्रिट’चे मुख्य कार्यकारी अधिकारी डॉ. प्रदीप मुखर्जी यांची प्रमुख उपस्थिती होती. केंद्रीय मंत्री नितीन गडकरी यांच्या हस्ते या प्रकल्पाचे भूमीपूजन होईल,’’ असे पाटील म्हणाले.