Pavana Flower Growers Association : पवना फूल उत्पादक संघाचा दिल्लीत सन्मान

अॅग्रोवन वृत्तसेवा
पुणे : संरक्षित फुलशेतीमधील उल्लेखनीय कार्याबद्दल मावळातील पवना फूल उत्पादक संघाचा दिल्लीत गौरव करण्यात आला.

नवी दिल्लीतील ट्रस्ट फॉर अॅडव्हान्समेंट इन अॅग्रिकल्चरल सायन्सेसतर्फे पवना फूल उत्पादक संघाचे (Pavana Flower Growers Association) अध्यक्ष मुकुंद ठाकर, सीमा ठाकर यांना भारतीय कृषी संशोधन परिषदेचे माजी महासंचालक डॉ. टी. महापात्रा (Dr. T Mahapatra) यांच्या हस्ते सन्मानित करण्यात आले. याबद्दल मावळ तालुक्यातील फूल उत्पादकांकडून कौतुक होत आहे.

ट्रस्ट फॉर ॲडव्हान्समेंट इन अॅग्रिकल्चरल सायन्सेस, नाबार्ड, अपेडा, आसीएआर, नॅशनल हॉर्टिकल्चर बोर्ड यांनी ‘भारतीय फ्लोरिकल्चरच्या संभाव्यतेचा उपयोग’ यावर राष्ट्रीय परिसंवाद आयोजित केला. त्या वेळी परिषदेचे माजी महासंचालक डॉ. आर. एस परोडा, फलोत्पादन विभाग उपमहासंचालक डॉ. ए. के. सिंग, भारत सरकारचे फलोत्पादन आयुक्त डॉ. प्रभात कुमार, डॉ. एन. के. दादलानी आणि पुण्यातील पुष्प संशोधन संचालनालय संचालक डॉ. के. व्ही. प्रसाद उपस्थित होते.

केंद्र व राज्य सरकार हे गटशेतीस प्राधान्य देत असून, देश व राज्यात शेतकऱ्यांचे गट शेतीतून आर्थिक सबलीकरण व्हावे, यासाठी शेतकरी संघ, शेतकरी कंपन्या उभ्या केल्या जात आहेत. याच अनुषंगाने मावळ तालुक्यातील पवनानगरच्या (येळसे) काही तरुण शेतकऱ्यांनी एकत्र येऊन पवना फूल उत्पादक संघ स्थापन केला. फुलशेतीमध्ये पथदर्शी कार्य करून राज्य व केंद्र सरकारपुढे एक आदर्श निर्माण केला. याचीच दखल घेत या संस्थेने घेतली आहे.

दरम्यान, या वेळी प्लॅस्टिक फुलांवर बंदी घालणे, प्लॅस्टिकवरील आयात कर वाढविणे व भारतातील फुले निर्यात करताना निर्यातक्षम फुलांवर लादण्यात आलेला जीएसटी कर बंद करणे, आयात-निर्यात मालावरील वाहतूक दर कमी करणे आदी विषयांवर चर्चा झाली.