Water Storage : मध्यम प्रकल्पात निम्माच पाणीसाठा

अॅग्रोवन वृत्तसेवा
Nanded News : नांदेड :  जिल्ह्यात अर्धाअधिक पावसाळा संपत आला असताना मध्यम प्रकल्पासह एकूण १०४ प्रकल्पातील पाणीसाठा मात्र निम्म्यावर आहे. सध्या जिल्ह्यातील प्रकल्पात ४०६.१६ दलघमीनुसार ५६.०६ टक्के पाणीसाठा शिल्लक आहे. मागील वर्षी याच काळात ५३५.२२ दलघमीनुसार ७३.५१ टक्के पाणीसाठा होता.  

नांदेड जिल्ह्यात यंदा जूनमध्ये पावसाअभावी धरणसाठ्यात कमालीची घट झाली होती. ८० प्रकल्प असलेल्या लघू प्रकल्पात तसेच नऊ प्रकल्प असलेल्या मध्यम प्रकल्पातील पाणीसाठा तळाला गेला होता. नांदेड जिल्ह्यातील एकूण १०४ प्रकल्पात २०३.३९ दशलक्ष घनमीटरनुसार २७.९३ टक्क्यांवर खाली आला होता. यानंतर जुले महिन्यात झालेल्या पावसाने २०० दशलक्ष घनमीटरपर्यंत वाढला आहे. सध्या जिल्ह्यातील १०४ प्रकल्पात ४०८.१६ दलघमीनुसार ७३.०६ टक्के पाणीसाठा झाला आहे.

परंतु हा साठा मागील वर्षाच्या तुलनेत १२७.०६ दलघमीनुसार १७.४५ टक्के कमी आहे. यातील नऊ मध्यम प्रकल्पात मात्र हा साठा निम्म्यावर आहे.
सध्या जिल्ह्यात मोठा प्रकल्प असलेल्या विष्णुपुरी प्रकल्पात ६६.८० दलघमीनुसार ८२.६८ टक्के पाणीसाठा झाला आहे. तर दुसरा मोठा प्रकल्प असलेल्या मानार (बारुळ) प्रकल्पात ६९.९८ दलघमीनुसार ५०.६३ टक्के, यासोबतच जिल्ह्यातील नऊ मध्यम प्रकल्पात ७०.०६ दलघमीनुसार ५०.३८ टक्के, चार कोल्हापुरी बंधाऱ्यात शून्य टक्के, ८० लघू प्रकल्पात १५९.१० दलघमीनुसार ९२.०७ टक्के पाणीसाठा आहे. नऊ उच्च पातळी बंधाऱ्यात ४२.२२ दलघमीनुसार २२ टक्के पाणीसाठा आहे. जिल्ह्यात एकूण १०४ प्रकल्पात ४०८.१६ दलघमीनुसार ५६.०६ टक्के पाणीसाठा शिल्लक आहे.