अॅग्रोवन वृत्तसेवा
Khandesh News : जळगाव ः खानदेशात खरिपात कांदा लागवड रखडत सुरू आहे. काही शेतकऱ्यांनी आगाप लागवड केली असून, ही लागवड ३०० ते ३५० हेक्टरवर झाली आहे. या महिन्यात लागवडीस वेग येईल, अशी अपेक्षा आहे.
खानदेशात खरिपातील कांदा लागवड साडेसहा ते सात हजार हेक्टरवर केली जाते. यंदाची लागवड साडेसहा ते सहा हजार हेक्टरवर होईल. खरिपातील लागवडीत धुळे जिल्हा आघाडीवर आहे. धुळ्यातील लागवड सुमारे साडेतीन ते चार हजार हेक्टर एवढी असणार आहे. जळगावात तीन व नंदुरबारात सुमारे एक हजार ते ७०० हेक्टरवर खरिपातील कांदा पीक असणार आहे,
असा अंदाज सुरुवातीपासून आहे. दर कमी असल्याने लागवड घटेल, परंतु धुळ्यातील लागवड फारशी घटणार नाही, असे चित्र आहे. धुळ्यात साक्री, धुळे तालुक्यात खरिपातील लागवड अधिक राहील. जळगावात यावल, चोपडा, धरणगाव, चाळीसगाव, जामनेर भागांत लागवड अधिक असेल. नंदुरबारात नंदुरबार, नवापूर व शहादा भागांत ही लागवड अधिक राहील. कांदा लागवडीसाठी जूनमध्येच अनेकांनी कांदा रोपवाटिका तयार केल्या होत्या.
काहींनी जुलैच्या मध्यात रोपवाटिका तयार केल्या आहेत. यामुळे लागवड आगाप व उशिरा, अशी असणार आहे. यंदा उशिरा लागवडीसंबंधी देखील अनेक शेतकरी पसंती देत आहेत. ज्यांनी जुलैच्या दुसऱ्या पंधरवड्यात रोपवाटिका तयार केल्या, त्यांच्या लागवडी या महिन्याच्या अखेरीस किंवा सप्टेंबरमध्ये सुरू होतील. परंतु जूनच्या सुरुवातीला किंवा जूनच्या दुसऱ्या आठवड्यातही अनेकांनी कांदा रोपवाटिका तयार केल्या होत्या, अशा शेतकऱ्यांच्या लागवडी पूर्ण झाल्या आहेत. या लागवडी धुळ्यातील साक्री, धुळे, जळगावमधील यावल भागात झाल्या आहेत.
मजुरांसाठी द्यावे लागतात वाहतूक भाडे
सध्या तणनियंत्रण व इतर कामे सुरू आहेत. त्यात कांदा लागवडीचे कामही अनेकांनी हाती घेतले, यामुळे मजूरटंचाई अधिकची दिसत आहे. कांदा लागवडीसाठी अनेक गावांत कुशल मजूर गट आहेत. त्यात धुळ्यातील लामकानी, कुसुंबा, कापडणे, जळगावात यावलमधील अडावद, धानोरा, डांभुर्णी, चोपड्यातील पंचक, खर्डी, धरणगावमधील पथराड, एरंडोलातील खर्ची आदी भागात कुशल मजुरांचे गट आहेत. एकरी साडेतीन ते चार हजार रुपये मजुरी घेतली जात आहे. काही भागांत मजुरी यापेक्षा अधिक आहे. मजुरांची ने-आण करण्यासाठी शेतमालकास पैसे किंवा वाहतूक भाडे द्यावे लागते. तसेच मजुरीदेखील लागलीच अदा करावी लागते. यामुळे उत्पादन खर्चाचा भारही येत आहे.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.