Divisional Commissioner : मधुकरराजे आर्दड यांनी मराठवाडा विभागीय आयुक्तपदाचा स्विकारला कार्यभार

Madhukarraje Ardad : सुनील केंद्रेकर यांनी स्वेच्छा निवृत्ती घेतल्यानंतर मराठवाडा विभागाच्या आयुक्तपदाचा पदभार जिल्हाधिकारी आस्तीककुमार पांडेय यांच्याकडे देण्यात आला होता. सरकारने छत्रपती संभाजीनगर येथीलच मृद व जलसंधारण आयुक्त मधुकरराजे आर्दड यांची मराठवाडा विभागीय आयुक्तपदी नियुक्ती केली. त्यांनी आपला पदभारही स्वीकारला आहे.

अपर उपसचिव नितीन गद्रे यांनी या संदर्भातील आदेश काढले. श्री. आर्दड यांना तत्काळ विभागीय आयुक्त म्हणून पदभार स्वीकारण्यास सांगितले. त्यानुसार श्री. आर्दड यांनी आयुक्तपदाची सूत्रे स्वीकारली आहेत. मृद व जलसंधारण आयुक्त छत्रपती संभाजीनगर या पदाचा अतिरिक्त कार्यभार तुर्तास त्यांनीच सांभाळावा, असे देखील पत्रात नमूद आहे.

आर्दड हे मुळचे जालना जिल्ह्यातील घनसावंगी तालुक्याच्या राजाटाकळी येथील आहेत. छत्रपती संभाजीनगर येथे ते जिल्हा परिषदेचे सीईओ, सिडकोचे प्रशासक म्हणून कार्यरत होते.