Weather Update : राज्यात आज हलक्या पावसाचा अंदाज

पुणे : कोकण आणि मध्य महाराष्ट्राच्या घाटमाथ्यावर पावसाची (Rainfall) संततधार सुरूच असल्याचे चित्र आहे. तर राज्याच्या अनेक भागात पावसाने उघडीप दिली आहे. आज (ता. २५) विदर्भात विजांसह पावसाची शक्यता (Rain Forecast With Lightning) आहे. तर उर्वरित राज्यात तुरळक ठिकाणी हलक्या पावसाचा अंदाज हवामान विभागाने (Weather Department) वर्तविला आहे.

वायव्य राजस्थान आणि परिसरावर ठळक कमी दाबाचे क्षेत्र सक्रिय आहे. त्याला लागूनच समुद्र सपाटीपासून ७.६ किलोमीटर उंचीवर चक्राकार वारे वाहत आहे. मॉन्सूनचा आस असलेला कमी दाबाचा पट्टा ठळक कमी दाबाच्या क्षेत्रापासून अजमेर, शिवपुरी, सिधी ते वायव्य बंगालच्या उपसागरापर्यंत कायम आहे. वायव्य बंगालच्या उपसागरात समुद्र सपाटीपासून ५.८ किलोमीटर उंचीवर चक्राकार वारे वाहत आहेत.

राज्यात बहुतांश ठिकाणी ढगाळ हवामान होत असले तरी अनेक भागात मुख्यतः पावसाची उघडीप असल्याचे चित्र आहे. कोकण आणि मध्य महाराष्ट्राच्या घाटमाथ्याकडील भागात मध्यम ते जोरदार पावसाने हजेरी लावली आहे. आज (ता. २५) विदर्भात विजांसह पावसाची शक्यता आहे. तर उर्वरित राज्यात पावसाच्या उघडीपीसह हलक्या सरींची शक्यता आहे. कमाल तापमान आणि उकाड्यातही वाढ होण्याचा अंदाज आहे.

विजांसह पावसाचा इशारा (येलो अलर्ट) :

बुलडाणा, अकोला, वर्धा, वाशीम, अमरावती, वर्धा, नागपूर, चंद्रपूर, भंडारा, गोंदिया, गडचिरोली.

बुधवारी (ता. २४) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलीमीटरमध्ये (स्रोत : हवामान विभाग) :

कोकण : माथेरान ७०, पेण ६०, वाकवली ५०, खालापूर, कर्जत, जव्हार प्रत्येकी ४०, सुधागड पाली, विक्रमगड, अलिबाग, पोलादपूर, वाडा, मंडणगड प्रत्येकी ३०.

मध्य महाराष्ट्र : लोणावळा ६०, गगनबावडा ५०, महाबळेश्वर, राधानगरी, त्र्यंबकेश्वर प्रत्येकी ३०.

घाटमाथा : दावडी, ताम्हिणी ११०, शिरगाव, डुंगरवाडी प्रत्येकी ९०, कोयना नवजा, अंभोणे प्रत्येकी ८०, वळवण ७०, खोपोली, भिरा प्रत्येकी ६०.

पुणे ः आज (ता.२५) राज्यातील पावसाचा इशारा (सौजन्य : हवामान विभाग).