Kolhapur Maratha Protest : गृहमंत्र्यांच्या राजीनाम्यासाठी उद्या कोल्हापूर बंद; सकल मराठा समाजाचा निर्णय

Kolhapur Maratha Samaj : मागच्या चार दिवसांपूर्वी जालना येथील अंतरवाली सराटी गावात मराठा आरक्षणाच्या मुद्दावरून उपोषण करणार्‍या मराठा आंदोलकांवर हल्ला करण्यात आला. या आंदोलकांवर लाठीमार झाल्याप्रकरणी गृहमंत्री देवेंद्र फडणवीस यांनी राजीनामा द्यावा या मागणीसाठी उद्या(ता.०५) मंगळवारी कोल्हापूर शहर बंद हाक सकल मराठा समाजाच्या वतीने देण्यात आली आहे.

सकल मराठा समाजाच्यावतीने दसरा चौकात आज (ता.०४) ११ वाजता जवाब दो आंदोलन करण्यात आले. यावेळी कोल्हापूर बंदची घोषणा सकल मराठा समाजाचे नेते वसंतराव मुळीक यांनी हा निर्णय जाहीर केला. यावेळी आमदार ऋतुराज पाटील, विजय देवणे, सुनील मोदी, रविकिरण इंगवले, आदिल फरास, गणी आजरेकर, दिलीप देसाई यांच्यासह विविध सामाजिक संघटनांचे पदाधिकारी उपस्थित होते.

कोल्हापुरातील दसरा चौकात मराठा समाजाचे आंदोलकांनी सरकारविरोधात जोरदार घोषणाबाजी केली. ‘जवाब दो, जवाब दो, महाराष्ट्र सरकार जवाब दो’, ‘चुकता होणार, चुकता होणार, हिशोब आता चुकता होणार’,‘एक मराठा, लाख मराठा’,‘या जनरल डायरचं करायचं काय, खाली डोकं वर पाय’ अशा घोषणांनी दसरा चौक दणाणून गेला.

यानंतर निमंत्रक वसंतराव मुळीक यांनी या आंदोलनामागील भूमिका स्पष्ट केली. अमानूष लाठीचार्ज करणाऱ्या जिल्हा पोलिस अधीक्षक अन् उपअधीक्षक यांना निलंबित करा, या घटनेची न्यायालयीन चौकशी व्हावी आणि गृहमंत्री फडणवीस यांनी राजीनामा द्यावा अशा मागण्या यावेळी करण्यात आल्या.

यानंतर शिवसेना जिल्हाप्रमुख संजय पवार यांनी उद्या, मंगळवारी कोल्हापूर शहर बंदचे आवाहन केले. त्याला सर्वांनीच पाठिंबा दिला. दरम्यान, कोल्हापूर सकल मराठा समाजाच्यावतीने कोल्हापूर बंदची हाक दिली आहे.

याचबरोबर याचे तीव्र पडसाद उमटू नयेत म्हणून कोल्हापुरातून पुण्याकडे जाणारी एसटी वाहतूक सेवा तात्पुरती थांबवण्यात आली आहे. तर कोल्हापूर सांगली या मार्गावरीलही बससेवा थांबवण्यात आली आहे. यामुळे प्रवाशांचे हाल होत आहेत.

मागच्या दोन दिवसांपासून पुण्याहून जालना, संभाजीनगर, नांदेडला जाणारी बससेवा ठप्प झाली आहे. सलग तिसऱ्या दिवशीही काही ठिकाणची बससेवा ठप्प असल्याने प्रवाशांचे हाल होत आहे. त्याचबरोबर कोल्हापुरातून पुण्याकडे जाणारी एसटी वाहतुक सेवा तात्पुरती थांबवण्यात आली आहे. यामुळे प्रवाशांचे हाल होत आहेत. प्रवासी पर्यायी मार्ग म्हणून खासगी बससेवा आणि रेल्वेचा मार्ग निवडत आहेत.