Modern Agriculture : शेतीमध्ये आधुनिकता रुजविणे गरजेचे

नागपूर : शेतीचे उत्पादन (Agriculture Production) वाढविणे, आपत्कालीन परिस्थिती ओढविल्यावर वेळेत नुकसानभरपाई (Crop Damage Compensation) मिळणे आणि आधुनिक बाबींचा वापर करून शेतीचे वृद्धीकरण करणे आज गरजेचे आहे. आधुनिक शेतीचा अवलंब केल्याने मध्य प्रदेशचा कृषी विकास दर (Agriculture Development Rate) गेल्या १२ वर्षांपासून १८ टक्क्यांपेक्षा जास्त आहे. यासाठी फक्त पारंपरिक शेतीवर अवलंबून न राहता आपण आधुनिक शेतीकडे वळायला हवे, असे मत मध्य प्रदेशचे मुख्यमंत्री शिवराजसिंह चौहान यांनी व्यक्त केले.

ॲग्रोव्हिजन फाउंडेशनतर्फे आयोजित अॅग्रोव्हिजन कृषी प्रदर्शनाचे उद्घाटन मुख्यमंत्री चौहान यांच्या प्रमुख उपस्थितीत पार पडले, त्यावेळी ते बोलत होते. दाभा येथील पीडीकेव्ही मैदानावर आयोजित या सोहळ्याच्या अध्यक्षस्थानी अॅग्रोव्हिजनचे मुख्य प्रवर्तक व केंद्रीय मंत्री नितीन गडकरी होते.

तर मंचावर पीडीकेव्हीचे कुलगुरू डॉ. शरद गडाख, अॅग्रोव्हिजनचे सल्लागार समितीचे अध्यक्ष डॉ. सी. डी. मायी, खासदार रामदास तडस, जिल्हाधिकारी डॉ. विपिन इटनकर, माजी खासदार विकास महात्मे, आमदार प्रवीण दटके, ॲग्रोव्हिजनचे संयोजक गिरीश गांधी, संघटन सचिव रमेश मानकर, रवी बोरटकर,मत्स्य विद्यापीठाचे कुलगुरू डॉ. आशिष पातूरकर, फाउंडेशनचे पदाधिकारी व मान्यवर उपस्थित होते. ‘भविष्यातील शेती : अन्न, चारा आणि इंधन’ ही यंदाच्या चार दिवसीय अॅग्रोव्हिजन कृषी प्रदर्शनाची संकल्पना आहे.

गडकरींबद्दल बोलताना शिवराजसिंह चव्हाण म्हणाले, नितीन गडकरींनी अशा कार्यक्रमांच्या माध्यमातून केलेले मार्गदर्शन आपण अवलंबले पाहिजे. संपन्न, समृद्ध आणि शक्तिशाली भारत निर्माण करण्यात नितीन गडकरी यांचा हात आहे. त्यांनी अद्भुत काम केले आहे.

गडकरींच्या मार्गदर्शनात सुरू झालेले हे प्रदर्शन शेतकऱ्यांचे जीवनमान बदलण्याचे काम करीत आहे. अशक्य वाटणाऱ्या गोष्टी ते तंत्रज्ञानाच्या मदतीने शक्य करीत आहेत. या प्रयोगाचा शेतकऱ्यांचा तर फायदा होतोच आहे. सोबत पर्यावरणासह पृथ्वीवर राहण्यालायक वातावरणाची निर्मितीसुद्धा यातून होते आहे. कार्यक्रमाचे सूत्रसंचालक रेणुका देशकर यांनी केले.