Irrigation Subvention Sangli : राज्यातील सर्वात कमी पावसाची नोंद सांगली जिल्ह्यात झाली आहे. दरम्यान पुढच्या काही दिवसांत पाऊस नाही झाल्यास जिल्ह्यातील अनेक खरिप पिके करपण्याची भिती आहे. दरम्यान सांगली जिल्ह्यात सर्वाधिक हळद आणि द्राक्ष पिकाचे उत्पादन घेतले जाते.
तर तासगांव, वाळवा, शिराळा, इस्लामपूर याभागात उसाचे मोठे उत्पादन घेतले जाते परंतु काही तालुक्यातील तहसिलदारांनी उपसाबंदीचे आदेश महावितरणला दिल्याने शेती पिके धोक्यात येण्याची भिती व्यक्त केली जात आहे.
सांगली जिल्ह्यात अत्यंत कमी पाऊस झाला आहे. याचबरोबर सांगली जिल्ह्यातील तालुक्यांमध्ये लहान- मोठ्या प्रकल्पात असणारा पाणीसाठी कमी होत आहे. भविष्यात पिण्याच्या पाण्याची भीषण टंचाई निर्माण होण्याची शक्यता आहे.
हे लक्षात घेऊन सध्या तासगाव तालुक्याच्या सर्वच तलावात उपसा बंदी आदेश लागू करण्यात आले आहेत. तसेच शेतीपंपाला सुरू असलेला वीजपुरवठा खंडित करण्याचे आदेश महावितरण तहसीलदारांनी दिले आहेत. दरम्यान, उपसा बंदी आदेशामुळे शेती धोक्यात येण्याची शक्यता आहे.
तासगावचे तहसीलदार रवींद्र रांजणे यांनी दिलेल्या आदेशानुसार आता उपसा बंदी लागू करण्यात आलेली आहे. तालुक्यातील अंजनी, पेड, मोराळे, पुणदी, बलगवडे, निमणी, सिद्धेवाडी या तलावातील पाणीसाठा कमी होत चालला आहे. सिंचनासाठी मोठ्या प्रमाणात पाण्याचा वापर सुरू आहे. यामुळे हा आदेश काढण्यात आला आहे.
भविष्यात पाण्याची भीषण टंचाई निर्माण होऊ शकते. खबरदारीचे उपाय म्हणून या तलावातील पाणी पिण्याच्या पाण्यासाठी राखीव ठेवणे आवश्यक आहे. याकरिता उपसा बंदी लागू केली असून वीजपुरवठा खंडित करण्याचे आदेश देण्यात आले आहेत.
या आदेशामुळे तलावांवर अवलंबून असणारी शेती धोक्यात येण्याची भीती निर्माण झाली आहे. ऊस, भाजीपाला, खरीप पिके व द्राक्ष उत्पादक शेतकऱ्यांना मोठा फटका बसण्याची शक्यता आहे. दरम्यान, तालुक्यातील सर्व पाणी योजना सुरू करून तलाव भरून घेण्याची मागणी शेतकरी वर्गातून होत आहे.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
