Marathawada Rain Update : दुसऱ्या दिवशीही पावसाचा जोर कायम

Chhatrapati Sambhajinagar News : मराठवाड्यात प्रदीर्घ खंडानंतर आलेल्या पावसाचा जोर शुक्रवारी (ता. ८) सकाळपर्यंतचे २४ तासांत सलग दुसऱ्या दिवशीही कायम होता. छत्रपती संभाजीनगर, जालना, व हिंगोली जिल्ह्यांत पावसाचा जोर अधिक दिसला.

तीन जिल्ह्यांतील ९ मंडलांत अतिवृष्टी झाली. बहुतांश मंडलात पावसाची हजेरी तुरळक, हलक्या स्वरूपाची होती, तर छत्रपती संभाजीनगर जिल्ह्यातील आसेगाव मंडल पावसाला अपवाद ठरले. दरम्यान, शुक्रवारी दुपारपर्यंत अनेक भागांत पावसाची अधून मधून हजेरी कायम होती.

छत्रपती संभाजीनगर जिल्ह्यातील ८४ पैकी ८३ मंडलात पावसाची तुरळक, हलकी, मध्यम, दमदार ते जोरदार हजेरी लागली. जिल्ह्यातील, सिल्लोड, फुलंब्री, सोयगाव, खुलताबाद, कन्नड तालुक्यात पावसाचा जोर अधिक राहिला.

सिल्लोड सोयगाव तालुक्यात तर सरासरी चाळीस मिलिमीटर च्या पुढे पाऊस झाला. जिल्ह्यातील सात मंडलात १० ते २० मिलिमीटर तर २० मंडलांत २० ते ४० मिलिमीटर व १३ मंडलांत ४० ते ६४.८ मिलिमीटर दरम्यान पाऊस झाला. जिल्ह्यातील अंभई मंडलात सर्वाधिक ६४.८ मिलिमीटर पावसाची नोंद झाली.

जालना जिल्ह्यातील सर्व ४९ मंडलांत हलकी, मध्यम ते दमदार पावसाची हजेरी लागली. जिल्ह्यातील तीन मंडलांत अतिवृष्टी झाली तर १६ मंडलांत २० ते ३० मिलिमीटर दरम्यान ११ मंडलांत ३० ते ५० मिलिमीटर दरम्यान, दोन मंडलांत ५० ते ५७ मिलिमीटर दरम्यान पाऊस झाला.

जिल्ह्यातील नेर मंडलात ८०.८ मिलिमीटर, शेवली ८०.८ तर पांगरी मंडलात ८०.८ मिलिमीटर इतक्या अतिवृष्टीची नोंद झाली. बीड जिल्ह्यातील सर्व ६३ मंडलात पावसाची हजेरी तुरळक ते हलक्या स्वरूपाची राहिली. जिल्ह्यातील ११ मंडलात १५ ते ३५ मिलिमीटर दरम्यान पाऊस झाला.

लातूर जिल्ह्यातील सर्व ६० मंडलांत तुरळक, हलका मध्यम पाऊस झाला. जिल्ह्यातील १५ मंडलात २० ते ४० मिलिमीटर तर १२ मंडलात १० ते २० मिलिमीटर दरम्यान पाऊस झाला.जिल्ह्यातील शिरूर ताजबंद मंडलात ४८.३ मिलिमीटर झालेला पाऊस सर्वाधिक राहिला.धाराशिव जिल्ह्यात सर्व ४२ मंडलात पावसाची हजेरी तुरळक, हलक्या स्वरूपाची राहिली. जिल्ह्यातील १० मंडलात १० ते २० मिलिमीटर दरम्यान पाऊस झाला.

नांदेड जिल्ह्यातील सर्व ८९ मंडलात पावसाची कमी अधिक प्रमाणात हजेरी लागली. जिल्ह्यातील आदमपूर मंडलात ६७.३ मिलिमीटर इतक्या अतिवृष्टीची नोंद झाली. जिल्ह्यातील २२ मंडलात १० ते २० मिलिमीटर, २७ मंडलात २० ते ४० मिलिमीटर तर दोन मंडलात ४० ते ४५ मिलिमीटर दरम्यान पाऊस झाला.

उर्वरित मंडलात १० मिलिमीटरच्या आत पाऊस झाला.परभणी जिल्ह्यातील सर्व ५२ मंडलात पावसाची हजेरी लागली. जिल्ह्यातील १८ मंडलात २० ते ३५ मिलिमीटर दरम्यान तर २२ मंडलात १० ते २० मिलिमीटर दरम्यान पाऊस झाला. हिंगोली जिल्ह्यातील सर्व ३० मंडलात पावसाची हजेरी हलकी, मध्यम ते दमदार स्वरूपाची राहिली.

जिल्ह्यातील १३ मंडलात २० ते ४० मिलिमीटर दरम्यान तर ४ मंडलात ४० ते ५३ मिलिमीटर दरम्यान पाऊस झाला. जिल्ह्यातील हट्टा मंडलात ९१.३ मिलिमीटर, साखरा ८४.८ मिलिमीटर, येळेगाव ८८.८ मिलिमीटर, नांदापूर ६७ तर डिग्रस मंडलात ८२.८ मिलिमीटर इतक्या अतिवृष्टीची नोंद झाली. पाणीसाठांची तहान कायम असल्याने अजूनही मराठवाड्यात सर्व दूर मोठ्या पावसाची नितांत आवश्यकता आहे.