Amravati Tribal News : मेळघाटातील आदिवासी बांधवांचे स्थलांतर (Tribal Migration) तथा जीवनमान उंचावण्यासाठी गुगामल वन्यजीव विभागाच्या (Forest Department) वतीने दरवर्षी उपाययोजना करण्यात येतात.
यावर्षीसुद्धा ‘मग्रारोहयो’अंतर्गत २१ हजार ८०४ मनुष्य दिवस निर्मितीचे उद्दिष्ट ठेवण्यात आले आहे. दरवर्षी स्थलांतर रोखण्यासाठी उपाययोजना करण्यात येत असल्याने आदिवासींचे जीवनमान उंचावण्यासाठी मदत होत आहे.
धारणी व चिखलदरा तालुका मिळून बनलेल्या मेळघाटमध्ये अनेक समस्या आहेत. त्यातीलच एक समस्या म्हणजे रोजगाराअभावी स्थानिक लोकांचे होणारे स्थलांतर. दरवर्षी मेळघाटातून आदिवासी बांधव रोजगारासाठी स्थलांतर करतात. हे स्थलांतर रोखण्याचे आव्हान शासनाच्या सर्वच विभागांसमोर असते.
त्यासाठी प्रत्येक विभाग आपापल्या माध्यमातून विविध उपाययोजना करतात. यामध्ये सर्वांत जास्त रोजगारनिर्मिती करून वन विभाग दरवर्षी मोलाची भूमिका बजावत असते.
वन विभागाअंतर्गत योजनांच्या तसेच ‘मग्रारोहयो’च्या माध्यमातून मोठ्या प्रमाणावर रोजगार उपलब्ध करून स्थलांतर रोखण्याचे महत्त्वाचे काम करण्यात येत आहे. यामध्ये गुगामल वन्यजीव विभागाचे भरीव योगदान आहे.
गुगामल वन्यजीव विभागामध्ये २०२२ मध्ये एकूण ५९० हेक्टर क्षेत्रावर रायमुनिया उच्चाटनाचे काम करण्यात आले. ज्यामधून ७७१३ मनुष्य दिवसनिर्मिती झाली. त्याशिवाय १५५ हेक्टर क्षेत्रावर अखाद्य वनस्पतींचे उच्चाटन केले.
त्यामध्ये २०६७ मनुष्य दिवसनिर्मिती झाली तसेच तपासणी नाके, संरक्षण कॅम्प, बिनतारी संदेश केंद्र व इतर विभागीय कामांच्या माध्यमातून ३२८९२ इतके मनुष्य दिवसनिर्मिती झाली, तर २०२२ चा वनवा रोखण्यासाठी केलेल्या जाळरेषा कापणे व जाळणे, या कामामधून जवळपास ५५०० मनुष्य दिवसनिर्मिती झाली.
त्यामुळे याहीवर्षी ‘मग्रारोहयो’अंतर्गत २१८०४ मनुष्य दिवसनिर्मितीचे उद्दिष्ट ठेवण्यात आले आहे. त्यासोबतच जाळरेषा कापणे, जाळणे यासाठी ६७०० मनुष्य दिवसनिर्मिती, तपासणी नाके, संरक्षण कॅम्प, बिनतारी संदेश केंद्र यामधून ३३ हजार मनुष्य दिवसनिर्मिती, गॉबियन बांधारे ४० कामे, गॉबियन ड्रेन ८० कामे, सिमेंट बंधारे १० कामे व इतर ४७ कामे या सर्व कामांमधून जवळपास ८० हजार मनुष्य दिवसनिर्मिती करण्यात येणार आहे.
दरवर्षी मोठ्या प्रमाणात मेळघाटातून आदिवासी बांधव रोजगारासाठी स्थलांतर करतात. त्यामुळे त्यांचे स्थलांतर रोखण्यासाठी व जीवनमान उंचावण्यासाठी मेळघाट गुगामल वन्यजीव विभागाच्या वतीने दरवर्षी उपाययोजना करण्यात येतात, त्या यावर्षीही करण्यात येत आहे.
- मयूर बैलूमे, वनपरिक्षेत्र अधिकारी.
ॲग्रोवनचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.