Sugarcane Season : नंदुरबार जिल्ह्यात चार साखर कारखाने सुरू होणार

Jalgaon News : खानदेशात उसाची लागवडदेखील बऱ्यापैकी आहे. नंदुरबार जिल्ह्यात सर्वाधिक १२ हजार हेक्टरवर ऊस आहे. यंदाही चार साखर कारखाने सुरू होतील. गाळपाची तयारी सुरू झाल्याची माहिती आहे. यंदा ऑक्टोबर अखेरीस ऊस गाळप सुरू होईल, असे संकेत आहेत.

ऊस तोडणीसाठी देखील निरभ्र, कोरडे वातावरण आवश्यक असते. यंदा कमी पाऊस दिसत आहे. यामुळे ऑक्टोबरमध्ये खानदेशात साखर कारखाने सुरू होण्याची शक्यता आहे. परंतु गाळपाची तयारी ऑक्टोबरच्या दुसऱ्या आठवड्यात पूर्ण होईल, असे दिसत आहे. नंदुरबार जिल्ह्यात दोन सहकारी व दोन खासगी कारखाने सुरू होतील.

त्यात पुरुषोत्तमनगर (ता. शहादा) येथे सातपुडा सहकारी साखर कारखाना, डोकारे (ता. नवापूर) येथे आदिवासी सहकारी साखर कारखाना, समशेरपूर (ता. नंदुरबार) येथे आयान शुगर आणि तळोदा येथे एक खासगी कारखाना सुरू होईल. गेल्या वर्षी समशेरपूर येथील कारखान्याने सुरुवातीपासून गाळपात आघाडी घेतली होती. तर समशेरपूर येथील खासगी कारखाना गाळपात पुढे होता.

या कारखान्याची गाळप क्षमता अधिक असल्याने या कारखान्याने देखील गाळपात वेग घेतला होता. यंदा आयान कारखानादेखील लवकर किंवा नोव्हेंबरमध्येच सुरू होईल, असे दिसत आहे. धुळे जिल्ह्यात गेल्या वर्षी एक प्रतिदिन ६०० ते ७०० टन ऊस गाळपासंबंधी गुऱ्हाळ सुरू झाले होते. यंदादेखील हे गुऱ्हाळ सुरू होईल, असे संकेत आहेत.

जळगाव जिल्ह्यात चहार्डी (ता. चोपडा) येथील कारखाना सुरू आहे. तसेच न्हावी (ता. यावल) येथील मधुकर सहकारी कारखाना सुरू करण्यासाठी देखील शेतकरी, संचालक आग्रही आहेत. मुक्ताईनगर येथील मुक्ताई खासगी कारखानादेखील यंदा सुरू होईल.

भोरस (ता. चाळीसगाव) येथील खासगी कारखाना मागील वेळेस सुरू होता. यंदाही हा कारखानात गाळप वेगात करील, असा अंदाज आहे. परंतु न्हावी (ता. यावल) येथील कारखाना यंदा सुरू होईल की नाही, याबाबत कुठलाही स्पष्टता अद्याप नाही.