Sugarcane Fire : वीजवाहक तारा पडून चार एकर ऊस जळून खाक

Sugarcane Fire News अंबासन, ता. सटाणा : द्याने (ता. सटाणा) येथील उस उत्पादक (Sugarcane Farmer) शेतकरी सुरेखा भरत कापडणीस यांच्या गट क्र.१६० व गौरव भरत कापडणीस यांच्या गट क्र.१६२ या दहा एकरातील उसाच्या शेतात (Sugarcane Fire) शनिवारी (ता. ११) जीर्ण झालेली उच्च दाबाची वीजवाहक तारा तुटून पडल्याने चार एकरावरील ऊस जळून खाक झाला.

गावातील नागरिकांनी धाव घेत आग आटोक्यात आणण्यासाठी प्रयत्न केल्यामुळे उर्वरित क्षेत्रातील ऊस वाचविण्यात यश आले. दरम्यान, ‘महावितरण’च्या निष्कळजीपणामुळे उस जळाल्याने शेतकऱ्यांनी आक्रमक पवित्रा घेऊन औरंगाबाद-अहवा राज्य महामार्गावरील राजपूर पांडे फाट्यावर रास्ता रोको आंदोलन करत संताप व्यक्त केला.

गेल्या अनेक वर्षांपासून महावितरण कंपनीच्या अनागोंदी कारभारामुळे शेतकरी त्रस्त आहेत. याच परिसरात मागील आठवड्यात रोहित्रावरील उच्च दाबाची जीर्ण झालेली तारा तुटली होती.

या वेळी कांदा पिकांना पाणी देत असताना शेतकरी महेंद्र धर्मा कापडणीस हे बचावले होते. कंपनीला जीर्ण वीजवाहक तारांसाठी माहिती देऊनही डोळेझाक होत असल्याने शेतकऱ्यांनी संताप व्यक्त केला.

दरम्यान, जायखेडा पोलिस ठाण्यातील सहायक पोलिस निरीक्षक श्रीकृष्ण पारधींसह फौजफाटा घेऊन तत्काळ आंदोलनस्थळी दाखल झाले. महावितरण कंपनीचे आधिकारी आंदोलनस्थळी भेट देत नाहीत तोपर्यंत रस्त्यावरून हटणार नाही, असा पवित्रा संतप्त शेतकऱ्यांनी घेतला.

दरम्यान महावितरणचे कोणीही आधिकारी फिरकले नाहीत. शेकडो शेतकऱ्यांनी राजपूर पांडे फाट्यावर तब्बल दीड तास रास्ता रोको आंदोलन केले. पारधी यांनी मध्यस्थी केल्यानंतर शेतकऱ्यांनी तुर्तास आंदोलन मागे घेतले.

आंदोलनात मधुकर कापडणीस, तुषार कापडणीस, शैलेंद्र कापडणीस, सतीष कापडणीस, श्रीकृष्ण कापडणीस, सुपनराव कापडणीस, निंबा कापडणीस, शांताराम कापडणीस, नानाजी कापडणीस, सचिन कापडणीस, दिलीप कापडणीस, राहुल कापडणीस, महेंद्र कापडणीस, दयाराम कापडणीस, मंगेश कापडणीस, गोपाळ कापडणीस, गणेश कापडणीस, सचिन नामदेव कापडणीस, दिनेश कापडणीस, संदीप कापडणीस आदी सहभागी झाले होते.

‘महावितरण’ला इशारा

संतप्त शेतकऱ्यांनी सहायक पोलिस निरीक्षक श्रीकृष्ण पारधी यांच्या मध्यस्थीनंतर आंदोलन मागे घेतले; मात्र सोमवारपर्यंत (ता. १३) जीर्ण तारांच्या दुरुस्तीसह सुरळीत वीज पुरवठ्याबाबत ‘महावितरण’ कंपनीला इशारा दिला.