BSKKV Dapoli : नवीन कुलगुरूंच्या नियुक्तीसाठी शोध समितीची स्थापना

Ratnagiri News ः येथील डॉ. बाळासाहेब सावंत कोकण कृषी विद्यापीठाचे कुलगुरू डॉ. संजय सावंत (Dr. Sanjay sawant) यांची कुलगुरूपदाची (Vice Chancellor) मुदत संपत आल्याने नवीन कुलगुरूंच्या नियुक्तीसाठी शोध समितीची स्थापना करण्यात आली असून, या समितीकडून कुलगुरू पदासाठी ३ एप्रिलपर्यंत अर्ज मागविण्यात आले आहेत.

दापोली येथील डॉ. बाळासाहेब सावंत कोकण कृषी विद्यापीठाचे कार्यक्षेत्र कोकण विभाग असून, या विद्यापीठांतर्गत ७ घटक व २१ खासगी- कृषी व संलग्न विद्या शाखेतील महाविद्यालये आहेत.

त्यांच्यामार्फत विद्यावाचस्पती पदवीसह पदवी व पदव्युत्तर अभ्यासक्रम शिकवले जातात. विद्यापीठाचे संशोधन कार्य १९ संशोधन केंद्रांमार्फत स्थानिक गरजा व संशोधनाची आवश्यकता विचारात घेऊन केले जाते.

या शोध समितीने केंद्रीय मत्स्य शिक्षण संस्था, वर्सोवाचे (मुंबई) सहसंचालक डॉ. एन. पी. साहू यांची समन्वयक म्हणून निवड केली असून, या संदर्भातील सर्व पत्रव्यवहार त्यांच्याकडे करण्यात यावा, असे सूचित करण्यात आले आहे.