Integrated Farming : एकात्मिक शेती पद्धतीतून शेतकऱ्यांना आर्थिक स्थैर्य

जालना : शेतकऱ्यांना आर्थिक स्थैर्य (Financial Stability) मिळविण्यासाठी पशू संवर्धनातून (Animal Husbandry) एकात्मिक शेती (Integrated Farming) पद्धतीचा विकास करणे आज काळाची गरज असल्याचे मत जिल्हा परिषदेचे जिल्हा पशुसंवर्धन अधिकारी डॉ. दिगंबर कांबळे यांनी व्यक्त केले.

कृषी विज्ञान केंद्र खरपुडी, जालना आयोजित ‘एकात्मिक शेती पद्धतीत पशुधनाचे महत्त्व’ या विषयावर एकदिवसीय प्रशिक्षणाचे आयोजन मंगळवारी (ता. २०) विस्तार कर्मचाऱ्यांसाठी करण्यात आले होते. या कार्यक्रमाच्या उद्‌घाटन प्रसंगी कृषी विज्ञान केंद्राचे वरिष्ठ शास्त्रज्ञ व प्रमुख एस. व्ही. सोनुने व निवृत्त कृषी अधिकारी नंदकिशोर पुंड यांची प्रमुख उपस्थिती होती. या प्रशिक्षणाचे जिल्ह्यातील पशू संवर्धन विभागातील पशुधन विकास अधिकारी व पशुधन पर्यवेक्षक या विस्तार कर्मचाऱ्यांकरिता कृषी विज्ञान केंद्र, खरपुडी येथे आयोजन करण्यात आले होते.

श्री. सोनुने म्हणाले, की एकात्मिक शेती पद्धतीमध्ये शेळीपालन, दुग्ध व्यवसाय, कोंबडीपालन, रेशीम उद्योग, फळभाज्या लागवड व फुलशेती इत्यादी व्यावसायिक पिकांचा अंतर्भाव केल्यास त्यांचे आर्थिक उत्पन्न वाढण्यास मदत होईल. पशू संवर्धनाची एकात्मिक शेती पद्धतीमध्ये महत्त्व असून, आज शेतीमध्ये सेंद्रिय कर्ब व मातीचे आरोग्य सुधारण्यासाठी पशुसंगोपन काळाची गरज असल्याचे जालना कृषी विभागाचे निवृत्त कृषी अधिकारी नंदकिशोर पुंड यांनी या विषयावर उपस्थित प्रशिक्षणार्थींना मार्गदर्शन केले.

या प्रशिक्षणामध्ये एकात्मिक शेती पद्धतीची कृषी विज्ञान केंद्राद्वारे विकसित केलेली विविध एकात्मिक शेती पद्धतीची मॉडेल्स या विषयी पशू वैद्यकशास्त्राचे विषय विशेषज्ञ डॉ. एच. एम. आगे यांनी सविस्तर माहिती सांगितली.