Kharif Sowing : पेरणीपूर्व पावसाची शेतकऱ्यांना प्रतीक्षा

Kharif Season 2023 : वळीव पावसाने दडी मारल्याने खरीप हंगामातील शेती कामांची गती मंदावली आहे. वळवाचा पाऊस झाल्याशिवाय मशागतीच्या कामाना वेग येत नाही.

कोवाड परिसरात बहुतांश भाताची पेरणी धूळवाफ पद्धतीने केली जाते. त्यामुळे पेरणीपूर्व वळीव पावसाची गरज असते. या वर्षी एकदाही असा मोठा वळीव पाऊस झाला नसल्याने शेती कामांची गती थंडावली. शेतकरी पेरणीपूर्व पावसाच्या प्रतीक्षेत आहे.

पावसाअभावी या वर्षी खरिपातील भाताचा पेरा लांबणीवर पडणार असे दिसते. चंदगड तालुक्याच्या पूर्व भागात माणगावपासून ते राजगोळीपर्यंत जास्तीत-जास्त भाताची धूळवाफ पेरणी केली जाते. कुरीने ही पेरणी केली जात असल्याने शेतीची मशागत चांगली व्हावी लागते.

पावसाच्या अंदाजावर खरिपातील पेरणी अवलंबून असल्याने शेतकरी पावासाची प्रतीक्षा करत आहेत. दरवर्षी मे महिन्यात अधूनमधून वळीव पाऊस पडतो. त्यामुळे मे अखेरीस किंवा जूनच्या पहिल्या आठवड्यात भाताची धूळवाफ पेरणी केली जाते. या वर्षी वळीवाने दडी मारल्याने शेती शेतीच्या मशागतीची कामे खोळंबली. पावासाची वाट पाहून शेतकऱ्यांनी शिवारं पेरणीसाठी तयार करून ठेवली आहेत.

२० टक्के शेतकऱ्यांनी धूळवाफ पद्धतीने भाताची पेरणी केली आहे. अजून ७० टक्के शेतकरी पेरणीच्या प्रतीक्षेत आहेत. १० टक्के शेतकरी फक्त रोप लागण करतात. त्यामुळे धूळवाफ पेरणीपूर्व पावसाची गरज असल्याने शेतकरी पावसाच्या प्रतीक्षेत आहेत. जूनपासून मॉन्सूनची सुरुवात होणार असल्याने शेतकऱ्यांनी दोन दिवसांपासून पेरणीला सुरुवात केली आहे.