Nashik District Central Cooperative Bank News: नाशिक : जिल्हा बँकेचा प्रश्न मार्गी लावण्यात पालकमंत्री दादा भुसे व सहकार मंत्री अतुल सावे हे अयशस्वी झाले. शेतकऱ्यांचा त्यांनी भ्रमनिरास केला. आता नवीन मंत्री झालेले जिल्ह्याचे नेते छगन भुजबळ यांनी हा प्रश्न मार्गी लावावा, अशी अपेक्षा स्वाभिमानी शेतकरी संघटनेचे प्रदेशाध्यक्ष संदीप जगताप यांनी व्यक्त केली.
गेल्या ४० दिवसांपासून नाशिक जिल्हा बँकेच्या विरोधात शेतकरी आंदोलन करत आहेत. या आंदोलक शेतकऱ्यांची भेट संदीप जगताप व ‘स्वाभिमानी’चे जिल्हाध्यक्ष निवृत्ती गारे पाटील यांनी घेतली.
जिल्ह्यातील ६२ हजार शेतकऱ्यांच्या जाचक कर्ज वसुलीच्या विरोधात अनेक वेळेस आंदोलने झालीत. पालकमंत्री भुसे यांच्या घरावर राजू शेट्टी यांच्या नेतृत्वात हजारो शेतकऱ्यांनी मोर्चा केला. या बिऱ्हाड मोर्चात नवीन ओटीएस योजना देण्याचे आश्वासन सहकार मंत्री अतुल सावे व पालकमंत्री भुसे यांनी दिले होते. परंतु या घटनेला सहा महिने उलटून गेले तरी सरकारने यावर ठोस उपाययोजना केली नाही.
शेतीकामे सोडून उपोषणाची वेळ
राजू शेट्टी व ‘स्वाभिमानी’च्या शिष्टमंडळाने अनेकदा मुख्यमंत्र्यांना भेटून त्याची वारंवार आठवण करून दिली. प्रत्येक वेळेस हा प्रश्न मार्गी लावू, असा शब्द सरकारने दिला. पण तो पाळला नाही. यामध्ये पालकमंत्री म्हणून भुसे व सहकारमंत्री म्हणून अतुल सावे अयशस्वी झाले. त्यामुळे गेली ४० दिवस जिल्ह्यातील शेतकऱ्यांना शेतीकामे सोडून उपोषण आंदोलनाला बसण्याची वेळ आली. म्हणून आता मंत्री भुजबळ यांनी हा प्रश्न मार्गी लावावा, अशी मागणी होत आहे. याप्रसंगी शेतकरी संघटना समन्वय समितीचे अध्यक्ष व आंदोलक भगवान बोराडे, सागर गवळी उपस्थित होते.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.