Pune News : शेतकरी संघटनेचे नेते आणि प्रदेशाध्यक्ष रघुनाथदादा पाटील हे तेलंगणाचे मुख्यमंत्री के. चंद्रशेखर राव (केसीआर) यांच्या भारत राष्ट्र समिती (बीआरएस) पक्षात दाखल झाले आहेत. तेलंगणानंतर महाराष्ट्रात ‘किसान सरकार’ स्थापनेसाठी प्रयत्नशील असलेले केसीआर यांच्या खांद्याला खांदा लावून काम करणार असल्याचे त्यांनी सांगितले. तर मंगळवारी (ता. १) केसीआर यांनी पाटील यांच्या साखराळे (इस्लामपूर) येथील निवासस्थानी एकत्रित भोजन केले.
शेतकरी संघटनेचे संस्थापक दिवंगत शरद जोशी यांच्यासोबत काम केलेले आणि त्यांचा वारसा पुढे चालविणारे रघुनाथदादा पाटील यांची नुकतीच हैदराबाद येथे मुख्यमंत्री के. चंद्रशेखर राव यांच्यासोबत तब्बल सात तास बैठक झाली. या बैठकीत दिवंगत शरद जोशी यांनी मांडलेला शेतीचा सिद्धांत आणि विविध शेतकरी कायद्यांवर सविस्तर चर्चा झाली.
अनेक कायदे शेतकरीविरोधी असल्याने शेतकरी आत्महत्या वाढत आहेत. शेतकरी आत्महत्यांचा कलंक पुसण्यासाठी केसीआर तेलंगणामध्ये विविध शेतकरी हिताच्या योजना राबवित आहेत.
याचा फायदा शेतकऱ्यांना होत असून, शेतकरी आत्महत्या कमी होत आहेत. काही दिवसांनी त्या पूर्णपणे बंद होतील. यामुळे आपण भारत राष्ट्र समितीत दाखल झाल्याचे त्यांनी ‘ॲग्रोवन’शी बोलताना सांगितले.
दरम्यान ‘बीआरएस’चे बोधवाक्य हे ‘अबकी बार किसान सरकार’ असून, या बोधवाक्यानुसार महाराष्ट्रातदेखील शेतकऱ्यांचे सरकार आणण्यासाठी आपण शेतकरी संघटनेचे अस्तित्व कायम ठेवून काम करणार असल्याचेही रघुनाथदादा यांनी सांगितले.
आगामी सर्व निवडणुकांमध्ये आपण राज्यभर दौरा करून शेतकरीविरोधी कायदे, दोन साखर कारखान्यांमधील हवाई अंतराची अट रद्द करणे, गोवंश हत्या विरोधी कायदा रद्द करणे आदी विषयांवर रान पेटवणार असल्याचे पाटील यांनी सांगितले.
Read the latest agriculture news in Marathi and watch Agriculture videos on Agrowon. Get the latest updates on Market Intelligence, Market updates, Bazar Bhav, Agriculture Jugad, and Farmer Success Stories.
ताज्या घडामोडींसाठी फेसबुक, ट्विटर, इन्स्टाग्राम आणि टेलिग्रामवर आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.
