Sugarcane Transportation : ओव्हरलोड वाहतुकीविरोधात ‘बळीराजा’चा एल्गार

ओव्हरलोड वाहतुकीविरोधात ‘बळीराजा’चा एल्गार

कऱ्हाड, जि. सातारा ः जिल्ह्यामध्ये साखर कारखाने सुरू झाले असून, या कारखान्यांसाठी ट्रक, ट्रॅक्टर (Tractor), बैलगाडीतून (Bailgadi) बेकायदेशीर उसाची वाहतूक (Sugarcane Transportation) केली जात आहे. परवान्यापेक्षा ज्यादा क्षमतेने उसाची वाहतूक केली जात आहे. प्रशासन व आरटीओने एक नोव्हेंबर २०२२ पर्यंत अवैध वाहतुकीवर तत्काळ कारवाई करावी, अन्यथा बळिराजा शेतकरी संघटना अवैध वाहतुकीविरोधात आंदोलन करणार असल्याचा इशारा संघटनेचे केंद्रीय अध्यक्ष पंजाबराव पाटील यांनी निवेदनाद्वारे दिला आहे.

श्री. पंजाबराव पाटील, सातारा जिल्हाध्यक्ष विश्वास जाधव यांच्या वतीने देण्यात मागण्यांचे निवेदन तहसीलदार विजय पवार यांना देण्यात आले. निवेदनातील माहिती अशी, की उसाच्या ओव्हलोड वाहतुकीकडे प्रशासन व आरटीओ विभाग जाणीवपूर्वक दुर्लक्ष करीत आहे. त्याचा नाहक त्रास शेतकऱ्यांना होत आहे. वाहनांच्या वाहतूक परवान्यापेक्षा ज्यादा क्षमतेने उसाची वाहतूक केली जात आहे, त्यामुळे ऊस उत्पादक शेतकऱ्यांना उसाचे वाहन शेतातून बाहेर काढण्यासाठी दोन ट्रॅक्टर, एक जेसीबी लावावा लागत आहे. याचा मोठा खर्च शेतकऱ्यांना करावा लागत आहे. तसेच, शेतरस्ते खराब होत आहेत.