Sindkhedaraja APMC Election : सिंदखेडराजा बाजार समितीची निवडणूक पुढे ढकलली

ॲग्रोवन वृत्तसेवा

Sindkhedaraja News : बुलडाणा ः जिल्ह्यात या महिन्यात १२ ऑगस्टला संग्रामपूर व सिंदखेडराजा कृषी उत्पन्न बाजार समित्यांची निवडणूक घेतली जाणार होती. यासाठी प्रक्रिया सुरू करण्यात आली. मात्र अतिवृष्टीच्या कारणाने आधी संग्रामपूरची निवडणूक व नंतर आता सिंदखेडराजा येथील बाजार समितीची निवडणूक पुढे ढकलण्यात आली आहे. याबाबत सहकारी निवडणूक प्राधिकरणाने आदेश बजावले आहे.

सिंदखेड राजा तालुक्यातील दोन मंडलांत झालेल्या अतिवृष्टीमुळे नैसर्गिक आपत्तीची परिस्थिती विचारात घेऊन स्थानिक कृषी उत्पन्न बाजार समितीची निवडणूक ३० सप्टेंबरपर्यंत पुढे ढकलण्यात यावी, असे निर्देश सोमवारी (ता. ७) राज्य सहकारी निवडणूक प्राधिकरणाने दिले.

प्राधिकरणाकडून प्राप्त पत्रात नमूद करण्यात आले आहे, की सिंदखेडराजा तालुक्यात ५ व ६ जुलै रोजी दोन मंडलांमध्ये अतिवृष्टी व ढगफुटी झाल्याने प्रचंड नुकसान झाले. या नैसर्गिक आपत्तीचा विचार करून सिंदखेडराजा कृषी उत्पन्न बाजार समितीच्या संचालक मंडळांची निवडणूक प्रक्रिया पुढे ढकलण्याबाबत ४ ऑगस्ट रोजी पत्राद्वारे प्राधिकरणाकडे विनंती करण्यात आली होती.

या आधारे महाराष्ट्र कृषी उत्पादन पणन (विकास व विनियमन) अधिनियमानुसार कृषी उत्पन्न बाजार समितीचा निवडणूक कार्यक्रम पुढे ढकलण्याचे अधिकार शासनास प्राप्त असल्याने प्राधिकरणाने सिंदखेडराजा बाजार समितीची निवडणूक प्रक्रियेबाबत वस्तुस्थितिदर्शक अहवाल शासनास सादर केला होता.

नैसर्गिक आपत्ती व पावसामुळे विस्कळीत होणारे जनजीवन व परिस्थिती पूर्वपदावर येण्यास लागणाऱ्या कालावधीचा विचार करता सहकारी संस्थेच्या निवडणुका ३० सप्टेंबर पुढे ढकलण्याबाबतचे आदेश निर्गमित करण्यात आले आहे.