Pomegranate Cultivation : ऐन हंगामात डाळिंब बागांवर पाणीटंचाईचे संकट गडद

Sangli News : देशातील डाळिंब उत्पादन घेणाऱ्या राज्यात शेतकऱ्यांनी पाण्याच्या उपलब्धतेनुसार आगाप मृग आणि जून महिन्यात मृग बहर धरला आहे. आतापर्यंत पिकाला पाणी पुरले. परंतु पावसाने दडी मारली आहे. त्यामुळे पाण्याचे गडद संकट निर्माण झाले आहे. परिणामी, इथून पुढे डाळिंब बागा पाण्याशिवाय कशा जगवायच्या, असा प्रश्‍न डाळिंब उत्पादकांना पडला आहे.

देशात यंदाच्या हंगामात जूनमध्ये ४० हजार हेक्टरवर बागा धरल्या आहेत. या हंगामातील डाळिंबाची विक्री ऑक्टोबरपासून सुरू होते. शेतकऱ्यांनी बहर धरल्यापासून उपलब्ध पाण्यावर बागा चांगल्या साधल्या आहेत. पुरेसा पाऊस आणि पोषक वातावरण असल्याने काडी चांगली झाली आहे. तसेच अपेक्षित फुलांचे सेटिंगही झाले आहे.

त्यातच ऐन पावसाळ्यात वाढत्या उष्णतेचा फटका बागांना बसला आहे. मोठ्या प्रमाणात फुलगळ झाली असल्याने उत्पादनही ५ टक्क्यांनी घटण्याची शक्यता डाळिंब संघाने व्यक्त केली आहे.

सध्या डाळिंबाच्या वजन वाढीचा काळ आहे. त्यामुळे बागेला पुरेसे पाण्याची गरज आहे. देशातील डाळिंब उत्पादन घेणाऱ्या राज्यात ऐन पावसाळ्यात अपेक्षित पाऊस झाला नाही. परिणामी, भूजलपातळी वाढ झाली नाही. शेतकऱ्यांनी उपलब्ध पाण्यावर आतापर्यंत बागा फुलविल्या. आता पाण्याची कमतरता भासू लागली आहे. कॅनॉलला पाणी नाही. त्यामुळे डाळिंब उत्पादक हतबल झाला आहे.

पूर्वहंगामातील डाळिंब विक्रीला

देशात यंदा ५ ते १० टक्क्यांवर आगाप बहर धरला आहे. त्यानंतर डाळिंबाला पोषक वातावरण असल्याने बागा चांगल्या फुलल्या आहेत. या बहरातील डाळिंबाची काढणी सुरू झाली आहे. आगाप मृग बहरातील डाळिंब बाजारात दाखल झाले आहेत. त्यास गेल्या वर्षीच्या तुलनेत प्रतिकिलोस २० ते २५ रुपयांनी दर जास्त मिळाला. डाळिंबाला प्रतवारी नुसार प्रतिकिलोस १०० ते १५० रुपये असा दर मिळत असल्याने शेतकऱ्यांना दिलासा मिळाला आहे.

गुजरातचा डाळिंब हंगाम संकटात

गुजरात राज्यातील निम्म्या भागात गेल्या चार दिवसांपूर्वी मुसळधार पाऊस झाला आहे. त्यामुळे डाळिंब हंगाम अडचणीत सापडला आहे. परंतु इतर भागातील डाळिंब पीक चांगले असल्याची माहिती संघाने सांगितली.