KDCC Bank Scheme : दुधाळ म्हैस योजना माहितीय का? कोल्हापूर जिल्हा बँक देतेय लाखो रुपयांचे कर्ज

Kolhapur District Bank News : कोल्हापूर जिल्हा बँकेकडून सुरू करण्यात आलेल्या दुधाळ म्हैस कर्ज योजनेला चांगला प्रतिसाद मिळत असल्याचे दिसून येत आहे. दरम्यान या योजनेचा लाभ घेऊन दूध संकलनात वाढ करा, असे आवाहन गोकुळ दूध संघाचे संचालक युवराज पाटील त्यांनी केले.

दुधाळ म्हैस कर्ज योजनेच्या मंजुरीपत्रांच्या वितरणावेळी ते बोलत होते. अध्यक्षस्थानी केडीसीसी बँकेचे संचालक प्रताप ऊर्फ भैया माने होते. याचबरोबर गोकुळ दूध संघाचे संचालक नवीद मुश्रीफ प्रमुख पाहुणे म्हणून उपस्थित होते.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

यावेळी गोकुळ संचालक युवराज पाटील म्हणाले की, आण्णासाहेब पाटील आर्थिक विकास महामंडळाच्या योजनेअंतर्गत केडीसीसी बँकेने दुधाळ योजना सुरू केली. त्यासाठी बँकेने ५०० कोटींचा तरतूद केली आहे. परराज्यातून आणलेल्या दुधाळ म्हशींसाठी एक लाख व दोन लाख अशी तरतूद करण्यात आली आहे. योजनेचा लाभ घेत दूध संकलन वाढवावे असे पाटील म्हणाले.

यावेळी भैया माने म्हणाले, केडीसीसी बँकेचे अध्यक्ष हसन मुश्रीफ यांनी दूरदृष्टीतून बँकेकडे दुधाळ म्हशींच्या खरेदीसाठी ५०० कोटींची तरतूद करण्यात आली आहे. कारण पुण्या-मुंबईसह राज्यभर म्हशीच्या दुधाची मागणी असल्याने कोल्हापूर जिल्ह्यात दूध वाढीसाठी हा प्रयोग करण्यात येत असल्याची माहिती माने यांनी दिली.

यावेळी सावर्डे खुर्द येथील अंबाबाई महिला सहकारी दूध संस्थेच्या सात जणांना मंजुरीपत्रांचे वाटप झाले. त्यांना ११ म्हशींसाठी ११ लाखांचे कर्ज मंजूर झाले. संस्थाध्यक्षा मंगल मालवेकर, सचिव पांडुरंग कदम, सागर मालवेकर, प्रवीण मालवेकर, महादेव मालवेकर, संतोष मोगणे, शामराव मालवेकर, संजय कदम, पांडुरंग कदम, भारती पसारे, सागर मोगणे, नामदेव मालवेकर प्रमुख उपस्थित होते.

अण्णासाहेब पाटील आर्थिक विकास महामंडळ अंतर्गत संदीप माळी (म्हाकवे), सुशांत पाटील ( बेलवळे खुर्द), बाजीराव कुदळे (उंदरवाडी), शंकर पाटील (चौडाळ), अजित हवलदार (लिंगनूर दुमाला), स्वागत पाटील (बानगे), विलास फराकटे (फराकटेवाडी) यांना पतपुरवठ्याची मंजुरीपत्रे दिली.