Cow Research Center : देशी गाय संशोधन केंद्र अत्याधुनिक करणार

पुणे ः ‘‘देशातील आणि महाराष्ट्रातील विविध दुर्मीळ देशी गोवंशच्या संवर्धनाचे (Cow Preservation) काम महात्मा फुले कृषी विद्यापीठाद्वारे (Pune Agricultural College)सुरू आहे. या कृषी महाविद्यालयातील देशी गाय संशोधन व प्रशिक्षण केंद्राला अत्याधुनिक करण्याबरोरच देशातील सेंटर फॉर एक्सलन्स करण्यात येणार आहे. यासाठी लागणाऱ्या ८९ कोटी रुपयांच्या निधीची तरतूद मार्च महिन्यातील अर्थसंकल्पात केली जाईल,’’ अशी माहिती कृषिमंत्री अब्दुल सत्तार (Abdul Sattar) यांनी ‘ॲग्रोवन’ला दिली.

मंत्री सत्तार यांनी महात्मा फुले कृषी विद्यापीठांतर्गत पुणे कृषी महाविद्यालयातील देशी गाय संशोधन व प्रशिक्षण केंद्राला मंगळवारी (ता.१) भेट दिली. या वेळी त्यांनी केंद्रातील सर्व विभागांना भेटी देऊन पाहणी केली. विद्यापीठाचे कुलगुरू डॉ. प्रशांतकुमार पाटील, महाविद्यालयाचे सहयोगी अधिष्ठाता डॉ. सुनील मासाळ, देशी गाय संशोधन केंद्राचे प्रमुख सोमनाथ माने या वेळी उपस्थित होते.

मंत्री सत्तार म्हणाले, ‘‘ब्राझीलसारख्या देशाने आपल्याच देशीवंशाच्या गायीवर संशोधन करून, सर्वाधिक दूध देणारी गाय विकसित केली आहे. आता ब्राझिल देशाचे अर्थकारण केवळ दुधावर चालते. मात्र आपले देशी गोवंशाकडे दुर्लक्ष झाले आहे. आता देशी गाय संशोधन केंद्राद्वारे देशातील विविध देशी गोवंशावर संशोधन आणि प्रजनन केंद्र सुरू केले आहे. या केंद्रातून दर्जेदार गायी निर्माण होऊन,

त्याचा फायदा शेतकऱ्यांना होणार आहे. या केंद्राच्या अत्याधुनीकरणाबरोबरच हे केंद्र देशातील सेंटर फॉर एक्सलन्स करण्यासाठीच्या ८९ कोटी रुपयांच्या निधीची उपलब्धता मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्यासोबत चर्चा करून अर्थसंकल्पात तरतूद केली जाईल.’’

‘देशी गोवंश दुधाची विक्री केंद्र काढणार’

‘‘कृषी विद्यापाठे आणि शासकीय कृषी महाविद्यालयांच्या परिसरात देशी गोवंशांची दूध आणि दुग्धजन्य पदार्थांच्या विक्री केंद्र सुरू करण्यात येणार आहे. यासाठी ‘फुले अमृत’ नावाचा ब्रॅण्डदेखील विकसित करण्यात आला असून या ब्रॅण्डअंतर्गत दुग्धजन्य पदार्थ विक्रीची ५०० चौरस फुटांची विक्री केंद्र सुरू केली जाणार आहेत,’’ असेही मंत्री अब्दुल सत्तार यांनी यावेळी सांगितले.