खरीपासाठी तीन लाख मेट्रीक टन खताची मागणी

पुणे : पुणे जिल्ह्यात खरीप हंगामाची (Kharif Season) तयारी सुरू झाली आहे. खरीप हंगामात शेतकऱ्यांनी कृषी विभागाकडे सुमारे दोन लाख ९१ हजार ९०० टन खतांची मागणी (Demand Of Fertilizer) नोंदविली आहे. तसेच गेल्या वर्षीचे ५१ हजार २५८ टन खते शिल्लक (Fertilizer) असून, खरिपासाठी मागणी केलेल्या खतांचे आवंटन (Fertilizer Allocation) मंजूर केल्यास मोठ्या प्रमाणात खते उपलब्ध होणार असल्याचे कृषी विभागाच्या सूत्रांनी सांगितले.

पुणे जिल्ह्यात खरीप हंगामाचे सरासरी दोन लाख ५ हजार १०८ हेक्टर क्षेत्र आहे. त्यापैकी दोन लाखांहून अधिक हेक्टरवर पेरणी होण्याचा (Expected Sowing) अंदाज आहे. यामध्ये भाताच्या (Paddy) व सोयाबीनच्या (soybean) क्षेत्राच्या वाढ होण्याची शक्यता आहे. शेतकऱ्यांची खरीप हंगामासाठी लागणाऱ्या खताच्या मागणीत वाढ होणार आहे. त्यामुळे कृषी विभागानेही (Agriculture Department) खताच्या अडचणी येऊ नये म्हणून नियोजन केले आहे. लवकरच कृषी आयुक्तालयाकडून या खतास मंजुरी मिळणार असून, त्यानंतर शेतकऱ्यांना या खताचा पुरवठा होणार आहे.

यंदा सरळ खतामध्ये युरिया, अमोनिअम, एमओपी आणि एस.एस.पी. अशा खतांचा समावेश होत असून, मोठ्या प्रमाणात उपलब्ध होणार आहे. यंदा युरियाची एक लाख २५ हजार टन, डीएपी ५० हजार, एमओपी ३२ हजार, एसएसपी २२ हजार तर संयुक्त खतांमध्ये ६२ हजार ९०० टन खतांची मागणी केली आहे. गेल्या वर्षी खरीप हंगामात शेतकऱ्यांनी कृषी विभागाकडे मोठ्या प्रमाणात खताची मागणी नोंदविली आहे. त्यानंतर कृषी विभागाने कमीअधिक प्रमाणात खताचा पुरवठा केल्याने काही वेळा टंचाई भासल्याची स्थिती होती. रब्बी हंगामात मोठ्या प्रमाणात खताचा पुरवठा झाल्यामुळे मोठ्या प्रमाणात खते शिल्लक राहिल्याचे चित्र आहे.