Chili Cultivation : कुठे वाढले तर कुठे घटले मिरचीचे क्षेत्र

Chhatrapati Sambhajinagar News : जालना व छत्रपती संभाजी नगर जिल्ह्यातील भोकरदन जाफराबाद सिल्लोड हे तीन तालुके हिरव्या मिरचीचे हब म्हणून ओळखले जातात. यंदा तालुक्यांतील काही भागात मिरचीची लागवड वाढली तर काही भागात लागवडीत घट आल्याची स्थिती आहे.

अजून कुठलेही कीड, रोगाचे आक्रमण झाले नसले तरी लांबलेल्या पावसाने मिरची जगवण्यासाठी टँकरने पाणी देण्याची वेळ शेतकऱ्यांवर आली आहे. दुसरीकडे अपेक्षित उत्पादनही येत नसल्याने भावात थोडी तेजी पाहायला मिळत आहे.

भोकरदन तालुक्यात गतवर्षीच्या हंगामात पाच हजार हेक्‍टरवर मिरचीची लागवड झाली होती. यंदा मात्र ही लागवड आतापर्यंत जवळपास ३००० हेक्टरवर झाली आहे. १० एप्रिल पासून मल्चिंग व ठिबकच्या साह्याने सुरू झालेली लागवड अजूनही सुरू आहे.

पिंपळगाव रेणुकाई, वालसावंगी, दानापूर, कुंभारी, मालखेडा ही मिरची संकलनाची प्रमुख गावे आहेत. मिरचीचे रोप अपेक्षित उपलब्ध असल्याने तसेच उत्पादनात घट असली तरी दरात तेजी असल्याने आणखी क्षेत्र वाढण्याची शक्यता आहे.

छत्रपती संभाजीनगर जिल्ह्यातील सिल्लोड तालुक्यात आतापर्यंत जवळपास ४६०० हेक्टरवर मिरचीची लागवड झाली. गतवर्षी याच तालुक्यात जवळपास ४२०० हेक्टरवर मिरची लागवड झाली होती. सिल्लोड तालुक्यातील गोळेगाव, अजिंठा, भराडी, आमठाणा, घाटनांद्रा, अंभई, शिवना ही मिरची संकलनाची प्रमुख केंद्रे आहेत.

जवळपास ७० ते ७५ गावांमध्ये मिरची लागवड केली जाते. मिरचीचे संकलन सुरू झाले,असून येणाऱ्या मिरचीला ७५०० ते ८३०० पर्यंत प्रतिक्विंटलला दर मिळत असल्याची माहिती शेतकऱ्यांनी दिली. मुंबई, कलकत्ता, बांगलादेश, काठमांडू, श्रीलंका आदी ठिकाणी या दोन्ही तालुक्यांतील हिरवी मिरची जाते. जाफराबाद तालुक्यात साधारणतः अडीच हजार हेक्टरवर मिरचीची लागवड केली जाते.

टँकरने पाणी देण्याची वेळ

सिल्लोड तालुक्यातील गोळेगाव, अंभई, शिवना आदी परिसरातील मिरची उत्पादकांना यंदा लांबलेल्या पावसाने टॅंकरने मिरचीला पाणी देण्याची वेळ आली. साधारणतः ५ ते ७ जूनपर्यंत पाऊस येईल असा अंदाज बांधून शेतकरी मल्चिंग व ठिबकच्या साह्याने मिरची लागवडीला प्राधान्य देतात.

यंदा मात्र हा अंदाज निसर्गाने फेल ठरवल्याने मिरची उत्पादकांना मिरची जगविण्यासाठी कसरत करण्याची वेळ आली. एका एकराला साधारणतः दिवसाला तीन ते चार टँकर लागतात. त्यासाठी प्रतिटँकर ७०० ते ८०० रुपये मोजावे लागत असल्याची माहिती मिरची उत्पादक अमोल बावस्कर यांनी दिली.