Galyukt Shiwar Yojana : नापीक शेती, माळरान होणार बागायती

Baramati Agriculture News : जिल्ह्यात मृद व जलसंधारण विभागाच्या वतीने गाळमुक्त धरण, गाळमुक्त शिवार अभियान राबविण्यात येत आहे. या योजनेअंतर्गत शेतकऱ्यांना इंधन व यंत्रसामुग्रीसाठी अनुदान देण्यात येणार आहे.

त्यामुळे तलावाची पाणी साठवण क्षमता वाढून नापिक व माळरान शेती, बागायती होण्यास मदत होणार आहे. यासाठी शेतकऱ्यांना या अभियानात सहभागी होण्यासाठी आवाहन करण्यात येत आहे

अभियानाअंतर्गत धरण किंवा तलावातील गाळ उपसून शेतात पसरविल्यामुळे कृषी उत्पादनात वाढ होणार आहे. तसेच धरण किंवा तलावाची मूळ पाण्याची साठवण क्षमता वाढण्यास मदत व्हावी, हा या योजनेचा मूळ उद्देश आहे.

त्यानुसार मृद व जलसंधारण विभागाकडून जिल्ह्यातील या अभियानाअंतर्गत गाळ उपसा करण्यासाठी इंधन व यंत्रसामग्रीसाठी प्रती घनमीटर ३१ रुपये खर्च शासनाकडून देण्यात येणार आहे.

ज्या शेतकऱ्यांना योजनेचा लाभ घ्यायचा आहे. त्यांनी संबंधित गावच्या ग्रामपंचायतीकडे अर्ज करावा. या योजनेअंतर्गत विधवा, अपंग, आत्महत्याग्रस्त शेतकरी, अंत्य अल्पभूधारक यांच्यासाठी (१ हेक्टरपर्यंत) व लहान (१ ते २ हेक्टर) शेतकऱ्यांना एकरी १५ हजार रुपये याप्रमाणे व अडीच एकर क्षेत्रासाठी ३७ हजार ५०० रुपयांचे अनुदान देण्यात येणार आहे. या योजनेची अंमलबजावणी अशासकीय संस्थेमार्फत करण्यात येणार आहे.

शेतकऱ्यांसाठी खूप फायदेशीर आहे. धरण व तलावातील गाळ काढल्यानंतर जल साठा वाढून भूगर्भातील पाण्याच्या पातळीत वाढ होण्यास मदत होईल. तसेच नापिक जमिनी सुपीक होण्यास मदत होईल. त्यामुळे जिल्ह्यातील अशासकीय संस्थानी जिल्हा मृद व जलसंधारण विभागाच्या कार्यालयाकडे तातडीने प्रस्ताव सादर करावेत.

-सुजाता हांडे, जिल्हा मृद व जलसंधारण अधिकारी

आमच्या शिवारातील गोंडगे पाझर तलावात गाळ साचला आहे. आम्हाला आमच्या शेतात गाळ टाकायचा आहे. त्यामुळे आम्ही या कामासाठी गेल्या काही दिवसांपासून या योजनेची वाट पाहत होतो. गाळ काढून शेतात भरण्यासाठी योजना आल्यामुळे पिके फुलविण्यास फायदा होणार आहे.

-विशाल गोंडगे, शेतकरी, सोनवडी सुपे