Animal Husbandry : नेदरलँडचे तज्ज्ञ देणार पशुपालनाचे धडे

अॅग्रोवन वृत्तसेवा
Netherlands Experts : पुणे : पुणे कृषी महाविद्यालयाच्या पशुसंवर्धन व दुग्धशास्त्र विभागामध्ये देशी गाय संशोधन व प्रशिक्षण प्रकल्पअंतर्गत नेदरलँड (Nedarland) येथील पीयूएम संस्थेचे तज्ज्ञ डॉ. यांक मॅट हे पुणे कृषी महाविद्यालयातील शास्त्रज्ञ, शेतकरी व विद्यार्थ्यांना पशुपालनावर धडे देत आहे.

हा कार्यक्रम पुढील पंधरा दिवस देशी गाय संशोधन प्रशिक्षण केंद्र व बारामतीतील सेंटर ऑफ एक्सलन्स डेअरी, कृषी विज्ञान केंद्र व काही शेतकऱ्यांच्या गोठ्यावरती घेण्यात येणार आहेत
कार्यक्रमाची सुरुवात विद्यापीठाचे कुलगुरू डॉ. प्रशांत कुमार पाटील यांच्या अध्यक्षेखाली शनिवारी (ता. ८) करण्यात आली.

पशुपालनातील विविध महत्त्वाच्या मुद्द्यावर प्रात्यक्षिक आधारित तांत्रिक मार्गदर्शन देण्यात येणार आहे. यामध्ये प्रामुख्याने गोट्यातील नियोजनासाठी नवीन तंत्रज्ञानाचा वापर, चारा उत्पादन व योग्य वेळी कापणी, मुरघास उत्पादनातील महत्त्वाचे घटक, जनावरांची दूध उत्पादकता व त्यांना आवश्यक असणारे आहार नियोजन, जनावरांच्या आरोग्याविषयी काळजी तसेच गाईंच्या वजनानुसार व दूध उत्पादनानुसार पशू आहार नियोजनासाठी नवीन तंत्रज्ञानाचा वापर या विषयावर मार्गदर्शन देत आहे. या प्रशिक्षण कार्यक्रमांमध्ये विद्यापीठातील शास्त्रज्ञ तसेच पदवीत्तर व पीएचडी विद्यार्थी यांना त्यांच्या संशोधन आधारित विषयावर मार्गदर्शन देणार आहे.

पशुसंवर्धनातील सर्व लहान बाबींचे निरीक्षण करून गाईचे आरोग्य आणि दूध उत्पादन आदींमधील वाढ फलदायी ठरेल. सर्व प्रशिक्षणाचा फायदा शास्त्रज्ञाद्वारे शेतकऱ्यांना देखील होणार आहे.

नेदरलँड स्थित पीयूएम ही संस्था जगामध्ये ३४ देशांमध्ये काम करत असून या संस्थेमध्ये १८० हून अधिक विविध विषयाचे तज्ज्ञ सेवाभावी कार्यातून विविध देशांना शाश्वत विकासासाठी मार्गदर्शन करत असतात.

कार्यक्रमाचे नियोजन करण्यासाठी विद्यापीठाचे कुलगुरू डॉ. प्रशांत कुमार पाटील, संशोधन संचालक डॉ. सुनील गोरंटीवार, पीयूएम प्रतिनिधी डॉ. करमन्नु कादरभाई, सहयोगी अधिष्ठाता डॉ. सुनील मासाळकर यांचे मार्गदर्शन लाभले आहे. विभाग प्रमुख डॉ. धीरज कंखरे, प्रमुख शास्त्रज्ञ डॉ. सोमनाथ माने यांनी या प्रशिक्षण कार्यक्रमाचे नियोजन केले आहे.