Wet Drought : ओला दुष्काळ जाहीर करण्याची ‘आप’ची मुख्यमंत्र्यांकडे मागणी

अकोला ः संपूर्ण राज्यात ओला दुष्काळ(Wet Drought) जाहीर करून प्रति हेक्टरी ५० हजार रुपये नुकसान भरपाई (Crop Damage Compensation) द्यावी. पीकविमा (Crop Insurance) कंपनीला सरसकट पीकविमा देणे अनिवार्य करावे, शेतमजुरांना रोजगार हमी योजनेअंतर्गत काम द्यावे, शेतीला दिवसा १२ तास वीजपुरवठा (Power Supply) करावा, थकीत वीजबिले व शेतीचे कर्ज माफ करावे अशा विविध मागण्या आम आदमी पक्षाच्या स्थानिक पदाधिकाऱ्यांनी जिल्हाधिकाऱ्यांमार्फत मुख्यमंत्र्यांकडे केल्या आहेत.

शेतकऱ्यांकडून विमा रकमेपोटी हजारो रुपये भरूनसुद्धा झालेल्या नुकसानीचा मोबदला मिळालेला नाही. विमा कंपन्या शेतकऱ्यांची फसवणूक करतात, ही विस्ताविकता सरकारला माहिती आहे. तसेच राज्यातील सरकारी शाळांचा दर्जा फारच खालावला आहे.

त्यामुळे शाळांमधील पट संख्या दिवसेंदिवस कमी होत आहे. यावर सुधारणा होणे अपेक्षित होते. परंतु सरकारने कमी पट संख्या असलेल्या शाळा बंद करण्याचा निर्णय घेतला आहे, असेही आम आदमी पक्षाने म्हटले आहे. पश्‍चिम विदर्भ संयोजक तथा राज्य कमिटी सदस्य शेख अन्सार, जिल्हा संयोजक अरविंद कांबळे, महानगर संयोजक डॉ. खंडेराव दाभाडे यांच्यासह कार्यकर्ते या वेळी मोठ्या संख्येने उपस्थित होते.