Kharif Seed : नगर जिल्ह्यात ४५ टक्के खरीप बियाणे पडून

Nagar News : जिल्ह्यात पुरेसा पाऊस नसल्याने पेरण्या होण्याला अडथळे निर्माण होत आहेत. त्याचा परिणाम खते, बियाणे विक्रीवरही झाला आहे. आतापर्यंत उपलब्ध बियाण्यांपैकी ४५ टक्के बियाणे पडून आहेत. उपलब्ध खतांपैकी आतापर्यंत केवळ १२ टक्के खताची विक्री झाली आहे. मूग, उडीद, सोयाबीनचे अधिक बियाणे शिल्लक आहे.

जिल्ह्यात खरिपाचे सरासरी ५ लाख ७९ हजार ७६८ हेक्टर क्षेत्र आहे. यंदा ६ लाख ३९ हजार ४३० हेक्टरवर पेरणी होण्याचा कृषी विभागाचा अंदाज होता. त्यानुसारच बियाण्यांची मागणी केली. कृषी विभागाने दिलेल्या आकडेवारीनुसार २०२० मध्ये ५१४८५ क्विंटल, २०२१ मध्ये ५३ हजार १३२ क्विंटल व २०२२ मध्ये ५० हजार ७७० क्विंटल बियाण्यांची विक्री झाली होती.

तीन वर्षांच्या सरासरीनुसार यंदा ७० हजार ५७० क्विंटल बियाण्यांची मागणी केली होती. त्यातील आतापर्यंत ५८ हजार ८०५ क्विंटल बियाणे उपलब्ध झाले. त्यातील आतापर्यंत ३२ हजार ७४९ क्विंटल बियाण्यांची विक्री झाली आहे.

उपलब्ध बियाण्यांतील ५५ टक्के बियाणे उपलब्ध विक्री झाल्याने ४५ टक्के बियाणे पडून आहे. शिल्लक बियाण्यांत सोयाबीन, बाजरी, मूग, उडदाचे अधिक बियाणे शिल्लक आहे.

खतांमध्ये या वर्षी ३ लाख ७ हजार ३८२ टन खतांची मागणी केली होती. त्यातील २ लाख १६ हजार ५०८ टन खते मंजूर होऊन ८६ हजार ७१५ टन खत प्राप्त झाले. ८१ हजार ६१७ टन खत मागील शिल्लक आहे.

मागील शिल्लक व सध्याचे उपलब्ध खत पाहता १ लाख ६८ हजार ३३२ टन खत उपलब्ध असताना आतापर्यंत केवळ २० हजार ६०९ टन खत विक्री झाले आहे. पुरेसा पाऊस नसल्याचा निविष्ठा बाजारावर परिणाम झाला आहे.

खत विक्री

(कंसात उपलब्ध खते (टनांत)

युरिया १६७९२ (५८८६९)

एमओपी ३८७ (४९६

एसएसपी ३२६ (२३६७४)

डीएपी १२८१ (१७६९३)

संयुक्त खते १८२३ (६७६००)

बियाणे विक्री क्विंटल (कंसात उपलब्धता (टनांत)

भात ३०८५ (३३३४)

बाजरी २०९५ (३६८७)

मका ३३४७ (७०२५)

तूर ६२१ (१३८४)

मूग ४६६ (१०६१)

उडीद ३४७८ (४५५१)

सोयाबीन १८३५४ (३५७७९)

कापूस १३०३ (१९८४)